南宁:“文化惠民活动”暖人心

Ndwencieng yaek daengz lo, 2 nyied 2 hauh, Swcigih Dangjveij Senhconzbu、Swcigih Vwnzmingzban、Gvangjsih Vwnz- lenz、Gvangjsih Cunghvaz Vwnzva Cuzcinvei doengzcaez cujciz, youq Nanzningz Minzcuz Gvangjcangz gawjhengz “Vwnzva Veiminz·Gvangjsih Bouxsuhfazgyah Sij Doiq Soengq Doiq Hozdung”, 60 boux suhfazgyah youq yienhciengz gaem bit sij doiq, sij baenz cien lai fuk doiq soengq hawj cien lai boux ginzcung daeuj camgya hozdung haenx, sij doiq soengq fuk angqcoux ndwencieng.

Aen hozdung sij doiq soengq doiq neix, gaenq guh gvaq 8 gaiq, baenz le aen binjbaiz Gvangjsih vwnzva veiminz gunghcwngz ndeu. Gyoengq suhfazgyah sij doiq, it dwg ndaej hungzyangz caeuq bujgiz le conzdungj vwnzva maenhndei guek raeuz; ngeih dwg gyoengqde giethab “sam roengz mbanj”、 “seiq haeuj segih” hozdung, bae daengz lajmbanj、hagdangz、 ndaw giyez, mienxngaenz bang gyoengq ginzcung sij doiq, saedyienh le caezdoengz yiengjsouh vwnzva cwngzgoj, ndaej daengz ginzcung haenhndei.(Dwng Cangz)