Cimdoiq roek aen cietheiq seizcin mehmbwn daegdiemj caeuq doiq aenndang vunzraeuz yingjyangj, youq gwnndoet ciengx ndang fueng- mienh aeu gaem ndei baihlaj geij aen yenzcwz:

Seizcin dwg aen geiqciet gak cungj nengzbingh caeuq veizswnghvuz sanjmaj、dauqndiu ndeu, vunzraeuz gig yungzheih sanjlah ndaej bingh. Ndigah, hableix dapboiq gwnndoet gezgou, cijndaej gaijndei aenndang 、daezsang rengz dingj bingh vunzraeuz, hawj vunzraeuz noix ndaej bingh.

Caeux cin mbwn lij haemq nit, ndang vunz vih dingj nit cix siuhauq bae itdingh naengzliengh daeuj veizciz ndangraeuj, ndigah, habbaenz yingz- yangj seizcin wnggai aeu huqndat guhcawj. Cawz gwn haeuxcab le, lij aeu bouj gwn di gijgwn hamz miz youhciz danbwz ndeu dem, lumj gyaeqgaeq、bya、nyauh、nohcwz、nohdouq、nohgaeq caeuq gij huq aeu duh guh haenx. Gij huq neix hamz dan’anhsonh lai, ndaej hawj ndang vunz lai dingj ndaej nit. Linghvaih, duhhenj、lwgraz、duhdoem、makhwz- dauz、gij huq aeu cij daeuj guh hix ndaej boujcung naengzliengh hawj aenndang bouxvunz.

Doengzseiz, seizcin youh dwg aen seizgeiz lwgnyez caeuq cinghsaunenz fazyuz haemq vaiq ndeu, vih baujcwng gyoengq lwgnyez ndang maj ndei, mwh gwnndoet seiz aeu bouj yingzyangj hawj de gwn gaeuq. Cawz danbwzciz caeuq gak loih veizswnghsu le, lij aeu bouj hawj de youzlauz、dansuij vahozvuz、gai、diet sinh daengj gvangvuzciz dem.