Vangz Binh youq ndaw ban dou dwg boux cunghdui ganbu, hix dwg baengzyoux ndei gou.

Miz baez ndeu hwnj dangz yinhyoz, gou caeuq Vangz Binh itheij naengh. Seizneix, geij boux doengz- hag naengh youq baihlaeng dou haenx cingq lwnh ngoenzlwenz bijsai cingzgvang, gij vah gyoengqde hawj gou dingq ndaej maez dwk, vihliux caeuq gyoengqde gangj vah, gou dawz cek saw daeuj dangj naj, caeuq gyoengqde lwnh gij cuzgiuzsai haenx. Vangz Binh naengh youq henz ndang gou yawj mbouj gvaqbae, doiq dou naeuz:“Gyoengqsou gaej gangj vah lo, lauxsae cingq hwnjdangz ne.”Gou naeuz:“Mbouj youqgaenj, mbouj hawj lauxsae raen couh ndaej lo.”Gou siengj, bingzciengz gou caeuq Vangz Binh ndei lumj beixnuengx, gamjcingz gig ndei, de mbouj gojnaengz lwnh hawj lauxsae. Siengj daengz neix, gou youh caeuq geij boux doengzhag haenx gangj vah lo. Siengj mbouj daengz Vangz Binh dawz mingzcoh gou geiq roengz- daeuj, siengj dawz gienh saeh neix lwnh hawj lauxsae.

Baenz neix, gou sim- vueng lo, gip dwk hanh gyaeuj conh. Gou sing daemq gouz de naeuz:“Vangz Binh, mwngz yawj songraeuz gamjcingz gig ndei, mwngz couh gaej dawz gienh saeh neix lwnh hawj lauxsae lo.” Vangz Binh mbouj leix gou, gou youh gangj vahndei naeuz:“Gou soengq haj mbaw cuzgiuz dozceij mwngz ceiq gyaez haenx hawj mwngz, ndei lwi?”De hix mbouj hai bak, lij caengz gou mbat ndeu. Gou sawqmwh gig hozndat, caen siengj dub de geij mbat, hoeng youh mbouj gamj dub.

Roengzdangz yaep he, lauxsae heuh gou bae ban’gunghsiz, gangj liux haujlai vah, ndaw sim gou gig nanzgvaq. Ma daengz gyausiz, gou di hix mbouj angq. Seizneix, Vangz Binh byaij daeuj doiq gou naeuz:“Siujfeih, gou dwg baengzyoux ndei mwngz, couh wngdang bang mwngz gaij loek, baenzneix guh cij caen dwg baengzyoux ndei.”Dingq le gij vah de, gou cij mingzbeg gvaqdaeuj. Daj haenx hwnj, gou caeuq Vangz Binh gamjcingz engq ndei lo, songdou guh gijmaz cungj mbouj doxliz.