Hag sat govwnz 《Lumh Seizcin》，lauxsae doigawj le bonjsaw ndei 《Haijlunz·Gaijlwz》 hawj raeuz yawj, gou yungh geij ngoenz seizgan, baedauq doeg baenz geij bienq, ndawsim gikdoengh fouzbeij, haujlai nanz mbouj ndaej caem roengzdaeuj.

Bonj saw neix gangj Haijlunz ngamq bi buenq seiz deng ciengz bingh hung le, damengz rwz hix nuk lo, swnghhoz youq ndaw laepcup caeuq doeknaiq haenx. Aenvih miz Cahlivwnz lauxsae saeqsim yinxson, Haijlunz dauq miz saenqsim laebdaeb lix roengzbae, vanzlij gig vanzgyangz. De gig gyaez hagsib, baengh gij cingsaenz mbouj fug saw haenx, doeklaeng baenz boux roxlai hawj vunz boiqfug he.

Dang gou doeg daengz gawq vah “de mbouj faen hwnzngoenz, lumj gaiq haijmenz hawq ndoet raemx nei ndoet aeu cihsiz. De buekmingh mo doeg sawmengz, mbouj dingz sij gij swz caeuq vahgawq, lwgfwngz iq cungj oklwed lo” seiz, gou gamjdoengh raixcaix. De dwg boux damengz rwz- nuk，lij ndaej yienghneix roengzrengz hagsib, siengj daengz cihgeij, ndangdaej yienghneix ndei, hagsib diuzgen hix mbouj loek, hoeng gangjdaengz roengzrengz beij de ca lai lo. Daj “ buekmingh” aen swz neix, gou gamjsouh daengz Haijlunz vih ndaej hagsib, mbouj cuengqsoeng saekdi. “ Cihsiz byaengq hai aenda Haijlunz, hawj de engq miz yungjgi caeuq saenqsim” gawq vah neix hawj gou caiq mbat he gamjsouh daengz cihsiz youq ndawsim Haijlunz daiq naek lo. Cihsiz mboujdanh hawj Haijlunz ndawsim bienq rongh, hix fungfouq le gij swnghhoz Haijlunz，hawj de youq ndaw laep hix yawjdaengz le saekcaij.

Doeg liux faenzcieng, gou ngeix ndaej engq laeg lo, Haijlunz lumj aengingq nei, ciuq ok gwnz ndang gou gij mbouj gaeuq ndei, ciuq ok gou caeuq de miz gijmaz mbouj doengz, hawj gou roxdaengz, cijmiz roengz- rengz hagsib, gou cij ndaej ganjhwnj yamqdin seizdaih, cijmiz hag ndaej Haijlunz cungj cingsaenz mbouj fug saw haenx, ngoenzlaeng cijndaej benz daengz dingjbya ceiq sang seiqvunz.

Youq ndaw faenzcieng, lij miz boux vunz ndeu hawj gou gamj- doengh raixcaix——Cahlivwnz laux- sae. Danghnaeuz mbouj dwg de roengzsim son’gyauq, Haijlunz couh mboujmiz gij cingzcik yienghneix hung. Dwg de youq Haijlunz siengsim seiz daeujdaengz henz dang de, son de hagsib, hawj de yungjgi caeuq saenqsim. Dwg Cahlivwnz lauxsae gij naihsim caeuq caenhsim caenhrengz, gaijbienq le gij mingh Haijlunz, hawj Haijlunz byaij hwnj diuzloh ronghsagsag.

Gyoengqvunz ndaej cwngzgungh haenx, de cungj miz cungj cingsaenz mbouj fug saw haenx, gyoengqvunz ndaej cwngzgungh haenx, ndaw cingzcik gyoengqde cungj miz gij lwedhanh haujlai boux lauxsae! Lauxsae, mboujdanh dawz cihsiz mbouj louz saekdi son hawj raeuz liux, caemhcaiq son raeuz haujlai doenghyiengh daengx ciuh souhyungh haenx!

(指导老师：梁青云)