Youq lajmbanj moix sam ngoenz couh daengz ngoenzhaw. Ngoenzneix youh dwg ngoenzhaw, gou angqvauvau dwk gaen daxmeh itheij bae haw lo.

Daeuj daengz gwnz haw, va, gwnz haw vunz lai raixcaix, nauhyied dangqmaz. Yawjyawj, ndaw diemq yienghyiengh cungj miz: Gijgwn、gijyungh……Dingq, sing bouxbuenq hemq gai, sing bouxcawx gangj gyaq, yienznaeuz mbouj ndeidingq, hix luenhcaucau, hoeng hawj vunz gamjdaengz cibfaen caenciet. Nyouq, heiq noh、heiq haiznaeng、heiq va……Doxgyaux youq itheij, dwg cungj feihdauh daegbied gangj mbouj ok mingz ndeu .

“Bae, raeuz bae cawx di bya baema cawj ba!” Gou gaen daxmeh daeujdaengz dieg gai bya, boux dax- au gai bya gaeb duzbya hung ndeu hwnjdaeuj bak riengj dwk doiq daxmeh naeuz:“Dahcej, cawx di bya saensien ba!” “Ndei, geijlai cienz it gaen?” Daxmeh cam. “Mbouj bengz mbouj bengz, gaen cij 7 maenz ngaenz.” “A? Neix lij mbouj bengz ha!” Daxmeh nyaeuq najbyak: “Naengz mbouj naengz caiq cienh di?” “Ndei ba, 6 maenz ngaenz gaen ndeu.” Boux daxau gai bya cang guh sim’in dwk naeuz, “mbouj ndaej caiq cienh lo.” Gou baez raen yienghneix, couh beng fwngz daxmeh naeuz:“Daxmeh, baihhaenx boux daxheiz cij gai 4 maenz ngaenz gaen ne!” Boux daxau gai bya raen dou yaek byaij deuz, lienzmuengz gangj: “Ndei ba, gou siedbonj gai hawj mwngz, 4 maenz ngaenz it gaen.” Dou couh cawx sam gaen bya.

Gou riuj sam gaen bya ma, youq gwnz loh sim siengj: Baezneix bae haw souhndaej caen mbouj noix ha, gou mboujdanh ndaej gwn bya, lij hag rox gangj gyaq ne!

（指导老师：覃珍团）