Aen haw neix dwg aen haw hunggvangq ndeu，miz hangz gai noh- ndip, miz hangz gai nohcug, miz hangz gai bya, miz hangz gai gyaeq……Boux daeuj guh gaicawx haenx mbaqswix bungq mbaqgvaz, byaidin caij giujdin, saek dwk gyang haw ndaetfwdfwd, sing hung sing iq cauzhuhu ……

Ausam ceiq fanz gij ciengz- mienh neix, hoeng, Simjsam maij gwn gyaeq, ndaw ranz gaenq mbouj miz gyaeq lo, de mbouj ndaej mbouj caenx haeuj gyang vunzlai ndaetfwdfwd haenx bae. Youq gyang vunzlai, Ausam yaek byaij yamq hung ndeu, cungj sinhoj lumj yamq hwnj mbwn bae ityiengh, de cijndei menhmenh nod din, mingzmingz yawjraen hangz gai gyaeq liz swhgeij mbouj gyae, de lij byaij le cibgeij faencung cij byaij daengz giz dieg gai gyaeq, de youq aen dan gai gyaeq daih’it couh ndwn dwk, lai yamq he hix mbouj siengj byaij lo.

“Cawx gyaeq lwi?” Mehmbwk gai gyaeq haenx ndatcingz dwk heuh boux byaij gvaq henz dan haenx, de dwg boux cungnienz ndeu, aennaj ciengzseiz riunyumnyum, dangqnaj de aemq aen daeh iq cang ngaenz ndeu.“Cawx gyaeq lwi?” “Cawx gyaeq lwi?” Aenbak de mbouj launaiq dwk heuh mbouj dingz.

“Gijneix dwg gyaeq buenq, gijneix dwg gyaeq bonjdieg, gijneix dwg……” Raen Ausam ndwn youq dangqnaj dan, mehmbwk angqvauvau dwk gaisau gij gyaeq de, aen naj riu ndaej lumj duj vamauxdan nei, gyaeundei youh maezvunz.

“Gyaeq buenq gaen geijlai?” Ausam mbouj caj de gangj sat couh cam.

“Gaen roek maenz.”

“Gou aeu seiq gaen.”

Mehmbwk dinfwngz riengj dwk nengh aen daeh suliu he ndenq hawj Ausam. Ausam senj gyaeq seiz, mehmbwk naeuz:“Gyaeq gou aen’aen dwg gyaeq ndei, senj mbouj senj cungj ityiengh. Gyaeq neix gou ngamq buenq ma, gyaeq moq, mwngz aeu lai di ha, mienxndaej daeuj cawx lai baez ne.”

“Gou noix gwn gyaeq ni, caiq gangj binghsiengh hix cang mbouj ndaej geijlai ni.” Ausam naeuz:“Yawjyawj gaeuq lwi?”Ausam ndenq daeh gyaeq senj ndei haenx hawj mehmbwk. Mehmbwk dawz daeh gyaeq cuengq roengz gwnz buenz caengh bae caengh:“Va, ngamq seiq gaen cingq, mwngz gujsoq caen cinj bw.”

“Aeu caengh gaeuq hawj gou bw!” Ausam naeuz.

“Eiya, gou ngoenzngoenz youq neix guh gaicawx, danghnaeuz guh gij saeh mbouj miz liengzsim haenx, mboujdan doiq mbouj gvaq beix- nuengx, lijdwg buen rin dub din swhgeij bw.”

Ausam cengq da hung bae cim dazcaengh, caen dwg seiq gaen dahraix. De ndenq mbaw 50 maenz he hawj mehmbwk, mehmbwk ciep ngaenz, dawz mbaw ngaenz yiengqsoh mbwn bae yawjyawj, liux le mbon daeh ra ngaenzlingz bouj Ausam.

Mehmbwk naeuz:“Mwngz miz seiq maenz cienzlingz hawj gou lwi? Gou bouj dauq mwngz 30 maenz.”

（caengz sat）

Cawx Gyaeq

买蛋

□ Lingz Siuyangh/凌秀香