Doeklaeng miz vunz sij saenq hawj lingjdauj baihgwnz, naeuz Veiz Gozcingh “byaij doulaeng”, cawx baengzbienzngeih. Genhveijvei cien- monz daeuj caz, ciuqsaed yiengq Gih Dangjveij veibau. Veiz Gozcingh doiq Genhveijvei Siz Dangz dungzci naeuz:“Yienznaeuz ciuq gyaqcienz hawciengz hawj ngaenz, hoeng mbouj dwg bae gwnzhaw cawx aeu hix dwg caen, yienghneix hix mbouj ndei. Lingjdauj ganbu gangj vah guh saeh cungj miz yingjyangj, doiq bonjfaenh aeu iugouz yiemz di ndei.”

Aen ciiq de youq Guengjsae naengh haenx, caeuq aen cigizbuj “Gahswh 69” de roengz lajmbanj seiz yungh haenx, 20 bi caengz vuenh gvaq. Doeklaeng de guh Cunghgoz Yinzminz Gaijfangginh Cungj Cwng- cibu cujyin，daengz ranghdieg henz- guek Guengjsae cazyawj hongguh, lij yungh aen ci “Gahswh 69” .

De doiq misuh、 gingjvei daengq- naeuz:“Ci dwg goenggya boiq hawj gou naengh guh hong, vunzranz lwgnyez mbouj ndaej seizbienh yungh.” Mbat ndeu, dahlwg youq Sanghaij doeg saw de aenvih bingh le dauqma Namzingz ywbingh, misuh dajsuenq baij ci bae coux, de mbouj doengzeiq, naeuz heuh de gag naengh cisamloek dauqma! Bingzseiz de caeuq yah de Hij Gizcen bae Swcigih Cwngfuj lijdangz hai hoih, yah de lij gag byaij loh bae, coengzlaiz mbouj naengh ci de bae.

Veiz Gozcingh miz geij boux nuengxsai, itcig youq lajmbanj guh hongnaz. Nuengxsai daihseiq de daj budui fuzyenz dauqranz, de doiq nuengx de naeuz:“Guek raeuz dwg aen guek seveicujyi ndeu, guh ganbu、 gunghyinz、nungzminz cungj doxlumj, cijdwg baen hong mbouj doxlumj ndwi. Bouxboux cungj aeu gwn haeux cij ndaej lix, mbouj miz vunz ndaem naz baenzlawz miz ngaiz gwn! Mwngz youq ranz guh hongnaz hix dwg doiq guek raeuz miz gung- yen.” De mbouj hawj vunzcaen ranzmbanj yungh mingzcoh de bae caeuq cwngfuj aeu ciuqgoq, Geij boux nuengx de gig gagnaek, coengzlaiz mbouj dawz mbaw baiz go’daih ok- daeuj doiq cwngfuj iet fwngz, lauxsaed guh vunzhongnaz.

(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz