（ciep geiz gonq）

Mbwk: Ngoenzhaenx byaij gvaq gai,

Beix baiz sau ndeu naengh;

Mwngz le gyaez dah haenx,

Dauq daeuj yaem naj gou.

Sai: Ndaekdaengq an gwnzgai,

Yietnaiq seizbienh naengh;

Saude vunz ndang maengh,

Beix mbouj caengz roxnaj.

Mbwk: Gwnz hix mbouj roxnaj,

Laj hix mbouj rox coh;

Danghnaeuz nuengx gangj boq,

Beix gaej coq ndawsim.

Sai: Hailangh ndei baenz maz,

Gaej gangjvah siujheiq;

Daj raen mwngz daengz neix,

Beix eiq nuengx cibfaen.

Mbwk: Gwnzbya faex mwncumh,

Miz gogungq gogaeuz;

Mbauq gwnzgai miz yaeuh,

Nuengx cij siengj aeu mwngz.

Sai: Nuengx lumjneix naekcingz,

Beix itdingh naiz gyaj;

Ndwencieng raeuz baema,

Yawj baez naj bohmeh.

Mbwk: Saeknanz ndi raennaj,

Nuengx gwj caz daengz mwngz;

Haemh roengzban haeuj ninz,

Fangzhwnz youh doekloq.

Sai: Mbouj gangj nuengx mbouj rox,

Haemh gwj loq mauxdan;

Langh ndaej nuengx ma ranz,

Gwn byaek van baenz noh.

Mbwk: Seizcin raemxmoq ma.

Ndei langhbya cuengqgyaeq;

Ngoenzlaeng miz lwgsaeq,

Dajneix caez haenqrengz.

Sai: Bohmeh giva nduen,

Guh ranzcuen(cien) sam caengz;

Bouxmoq ranzmoq baenz,

Raeuz cix raen mbwngvangq.

Hab: Saehndei menhmenh muz,

Doxhuz ndei raixcaix;

Swyouz vuenyungz lai,

Song baih ndi yungh moiz.

( sat)