1、Hab bauj raeuj. Vahsug naeuz: “Nit daj laj din hwnj.” Aenvih angjsin lizhai simdaeuz gyae, lwed gunghawj haemq siuj, youzlauz biujmienh mbang, bauj raeuj naengzlig ca, baez deng liengz le, gig yungzheih baenz dwgliengz、aek in、hwet in din naet. Daegbied dwg gij bouxlaux baenz binghnyouhdangz haenx, din yungzheih dekleg deng nit sieng, hab daenj gij mad yungh faiq guh youh na haenx daeuj bauj raeuj.

2、Hab seuqsak. Genhciz moix ngoenz swiq din, yaek ninz gaxgonq aeu raemxndat cimq din saek 10 faen cung, ciengzseiz vuenh mad.

3、Hab lienhndang. Fajdin youq gwnz ndang vunz deng heuhguh “aen simdaeuz daihngeih”, de liz simdaeuz ceiq gyae, danhseih de cix cigciep cozyung youq laeng aen simdaeuz. Boux baenz binghnyouhdangz gimq dinghdingh naenghsoengz daiq nanz, ndaej gaengawq aenndang gengangh cingzgvang ciengzseiz genhciz guh di yindung fajdin ndeu. Daegbied dwg youq ndaw seizdoeng, gaej dungx byouq bae yindung, caemhcaiq guh daengz dinghseiz dinghliengh. Vih hawj aen siuvaq hidungj goengnaengz mienx deng yingjyangj, wnggai gwn ngaizromh gvaq 30 faen cung le caiq bae yindung. Boux baenz binghnyouhdangz ndang youh haemq ca haenx, haethaemh okbae yindung mbouj ndaej siuj gvaq 30 faen cung. Danghnaeuz mboujmiz seizgan okbae yindung, hix wnggai youq ndaw ranz menhbyaij 5000 lai yamq. Baenzneix ndaej gaijndei fajdin lwed lae baedauq, demgiengz rengz dingj bingh, hawj vunz mbouj yaeuhfat baenz bing- fazcwng.