Raemxraeuj cat heuj. Yihyoz conhgyah doiq diuzheuj swnghdai diucaz ndaej rox, diuzheuj ndaw conghbak youq mwh 35 daengz 36.5 doh seiz naengz cingqciengz sup aeu caeuq baiz ok. Naengh diuzheuj ciengzseiz deng rwd ndat rwd gyoet daeuj gig, nanz le couh rox yinxfat baenz heuj in caeuq nohheuj foeggawh. Ndigah, hamz 35 doh raemxraeuj riengx bak, mizleih diuzheuj gengangh, hix ndaej cingcawz gij haeuxbyaek caeuq sigin saek youq geh heuj, dabdaengz hoh heuj caeuq gemjsiuj conghbak baenzbingh.

Raemxgyoet swiq naj. Seizdoeng naengnoh fajnaj aen- vih deng mbwn nit daeuj gig, sailwed conghbwn sousuk. Yungh raemxndat swiq naj, dangseiz yienznaeuz gamjdaengz raeujrub, danhseih gij ndat siu bae le, sailwed conghbwn youh hoizfuk dauq gaeuq, baenzneix baez hoet baez iet, naengnoh fajnaj yungzheih bienqbaenz nyaeuqnyat. Haetromh yungh raemxgyoet swiq naj, yaepyet couh gamjdaengz uk singj da raeh. Raemxgyoet daeuj gig gawq ndaej gaijndei lwed fajnaj lae baedauq, youh ndaej hawj naengnoh fajnaj miz danzsingq. Gij baujgen cozyung de gawq youq laeng demgiengz rengz dingj bingh aenndang, youh ndaej yawhfuengz baenz dwg- liengz caeuq ndaeng haenz, doiq boux sinzgingh hawnyieg baenz sinzginghsing gyaeuj in haenx daeuj gangj hix miz ndeicawq. Dangyienz, raemx- gyoet vwnhdu mbouj hab daemq lai, loq sang gvaq 10 doh couh ngamj.

Raemxndat cimq din. Yaek haeujninz gaxgonq yungh 55 daengz 70 doh raemxndat cimq din, gawq ndaej gaij naet youh ndaej coi vunz ninz ndaek vaiq. Hezvei fajdin vunzraeuz gig lai, cimq raemxndat ndaej soeng nyinz vued lwed, gyavaiq lwed lae baedauq, caemh ndaej fuengz bingh yw bingh.