Seizdoeng gwn gijmaz ne? Seizdoeng byaekheu noix, binjcungj dandiuh. Ndigah, vunzraeuz ciengz dwg gvaq seizdoeng le ndaw ndang veizswnghsu mbouj gaeuq. Mwh ndaw ndang siuj veizswnghsu C seiz, mbouj siuj bouxlaux couh okyienh baenz conghbak biux naeuh、nohheuj foeggawh、ok lwed、baenz haexgaz daengj binghyiengh. Seizdoeng byaekheu noix, ndaej habdangq gwn di lwgmaenz caeuq maenzdoengzlingz ndeu. Lwgmaenz caeuq maenzdoengzlingz hamz veizswnghsu C、veizswnghsu B lai, daegbied dwg ndaw ndang noix veizswnghsu A seiz, lwgmaenz simhoengz hamz huzlozbuzsu haemq lai, gwn de ndaej siu ndaw ndat、cawz doeg raq. Linghvaih, cawz gwn byaek- heu le, lij ndaej gwn di lauxbaeg hau、lauxbaeg nding、ngaz duh- henj、ngaz duh- heu、byaek- youzcai daengj, gij byaekheu neix hamz veizswnghsu haemq lai. Cijaeu ciengzseiz vuenh gwn binjcungj, hableix dapboiq, lij dwg gaeuq aenndang bouxvunz sihyau da. Seizdoeng mbwn nit, bouxlaux aenvih souh daengz siuvaq supsou caeuq ndaw ndang baiz ok yinhsu yingjyangj, ciengz dwg noix gyaz、gai、naz、diet daengj yenzsu, caiq gyahwnj seizdoeng ndang vunz nyouh lai, geij cungj yenzsu gwnzneix riengz nyouh baiz ok hix lai, ndigah, ndaej lai gwn di gijgwn hamz gai、diet、naz、gyaz daengj doxgaiq ndeu, lumj nyauh、byuk nyauh、ciengq lwgraz、daepmou、gyoijhom daengj. Boux ndaw ndang noix naz haenx, mwh cauj byaek seiz dwk gyu loq hamz di couh ndaej.