Veiz Gozcingh naeuz gvaq, gyoengq dungzci neix bi’ndwen hoenxciengq hojnanz baenz hauhde cungj dingj gvaqdaeuj, baenzlawz ndaej yaep ndeu couh bienqbaenz fanjdangj ne? De vanzlij dangqnaj doiq Liu Lenzyenz naeuz gvaq, dawz sou veh loeng lo. Doeklaeng Veiz Gozcingh sawq hawj geij boux dungzci neix dauqfuk haeujdangj moq. Hoeng, youq mwhde cungj vanzging cwngci hauhde, aen siengjfap de mbouj ndaej bienqbaenz caen gvaq. Itcig daengz Dangj Cib’it Gaiq Samcung Cienzhoih niuj luenh fanj cingq liux le, gij vwndiz gyoengq dungzci neix cij ndaej gaijgez liux bae.

Dang bouxdaeuz dangj、 cwng、 ginh Guengjsae, Veiz Gozcingh roxdaengz gaiqrap gwnz mbaq naekgywg. Guh hong gaenxgyaek youh nyinhcaen, gwndaenj mbaet gwn mbaet yungh, mwhmwh cungj miz gij bonjsaek gvensim lwgminz. Youq gij ndwenngoenz hojgungz mwhde, de bae daengz lajmbanj diucaz, couh caeuq seyenz doengz youq ndaw ranz- cawjngaiz gwn haeux, youq ranz vunzhongnaz ninz aen mbonq baij youq gwnz namh haenx. Youq ndaw gihgvanh, vunzranz de caeuq ganbu cizgungh doxlumj doengz bae ranz- cawjngaiz hung baizdoih cawx ngaiz gwn. Gih Dangjveij Bangunghdingh daengz ngoenzsinghgiz le couh youq ndaw hongh cuengq denyingj, de caeuq ganbu cizgungh doxlumj, caeuq vunzranz lwgnyez caez yawj denyingj.

60 nienzdaih co, gaiqgwn fusizbinj gig noix. Miz bi ndeu bet nyied cibngux, Swcigih Cwnghez fucujsiz Luz Siuyenh baij vunz soengq gaen lai daepmou hawj Veiz Gozcingh, naeuz dwg ranzcawjngaiz Cwnghez gaj mou, de baen ndaej faenh ndeu soengq di ndeu hawj Veiz Gozcingh boujbouj ndang. Luz Siuyenh dwg boux dungzci geq Hungzcizginh ndeu, nienzgeij beij Veiz Gozcingh geq. Veiz Gozcingh doiq dungzci gig gingqcungh, bi’ndwen hojgungz, de daegbied daengqnaeuz, aeu ciuqgoq ndei gwndaenj boux dungzci geq.(caengz sat)

韦国清上将主政广西二十年

□ Hoz Saubangj sij Cinz Siengzcouh Liuz Gingliuj Cinz Siengzgen hoiz