Daengngoenz hwnj baihdoeng

De cix hoengzluenluen

Gyau daz sei giet muengx

De cix nyuenx(unq)baenz bwn

Yut go’gyaj hwnj sang

Gan guh hong mbouj dij

Gohaeux laemxsim viq

De cij maj cij hung

Go’ndwq mbouj miz va

Youq cengjnga ok lwg

Vamauxdan hoengzfwg

Raen lwg youq gizlawz

Lwgsae ndi miz ga

Baenzngoenz baz lajnamh

Duzyou ga raezrangh

Mbouj raen yamq saek baez

Bakmbanj miz gorungz

De hungsang baex ndit

Lingzcih duj daemqdit

Guh yw it daengj ndei

Duzgoep youq lajcingj

Mbouj roxsingj mbwn hung

Duzroeg mbin ok rungz

Seiqcawq doeng diendeih

Duzndwen ndonj namh mboeng

Siengj bienq lungz mbouj ndaej

Roeglaej mbin gwnz faex

Siengj baenz gaeq hix nanz

Duzvaiz haeuj nazbyaek

Faex ndifaet mbouj deuz

Duznou raen duzmeuz

Daj gyae nyeux cungj lau

Roeg fwed raez rox mbin

Gag ra gwn ciengx mingh

Vunz doegsaw coengmingz

Roxdingh bae guhvunz

Ranz miz doiq gvanbaz

Ndei danggya ingqseiq

Guh hong miz cawjeiq

Mbouj heiq ndaw ranz gungz

Yiengzlwg gwn cij meh

Duzde gvih boizaen

Vunz seng youq lajmbwn

Aeu caen(gingq) laux gyaez nomj

Gofaex hung youh mwn

Cienz baengh gaen’goek laeg

Faekduh raez youh fag

Gauq rag gwn bwnh lai

Gocieg lumj go’gyoij

Baez ngoiz cix nanz faen

Vunzndei caeuq vunzgan

Song aen sim mbouj doengz

Duzmeuz lwgda raeh

Gaemh ndaej nou ndawlaep

Duzma sim dungx gaeb

Caenh doxhaeb ceng haex

Diet cix lau hwnjmyaex

Gofaex lau rag nduk

Vunz cix lau rwz nuk

Guk haeb mbouj roxnyinh

Moeggva got hozmeh

Rox de vih gijmaz

Gomez mbouj hai nga

Itsim hah gyoengq lwg

Baihnaj vaiz rox bae

Gaenlaeng cae rox haeuj

Guek miz dangj lingjdauj

Lwgminz angqvau gaen.