(ciep geiz gonq)

Bouxdaeuz maxbang raen dahsau baenzneix maezcingz, deng gamj- doengh lo, roxnyinh baezneix caiq mbouj siengj yaeuh de lo, de mbouj ndaej mbouj dawz gienh saeh fatseng youq geij bi gonq neix lwnh hawj dahsau nyi, bouxdaeuz maxbang naeuz:

“Ngoenz daihngeih，mwh songsou doxbiek, doih maxbang youq byongh- roen bungzdaengz caegduet. Daeg- mbauq vih baujhoh maxbang, bongh ak hwnjbae caeuq bangcaeg doxhoenx, lij gotdawz caegdaeuz caemh rouxringx roengz lajdat bae, mwh de yaek goenqsai, lij niemh daengz mwngz, daengq gou dawz gagoenh soengqdauq hawj mwngz, caemhcaiq heuh mwngz gaej caj de lo. Vihliux hawj mwngz daisim, dou couh ciuq gij eiq daegmbauq bien gij saeh neix daeuj yaeuh mwngz.”

Dahsau dingq le, daej ndaej engq siengsim lo, coenz maz hix mbouj gangj, cienq ndang couh buet haeuj ndaw ranz bae.

Gvaqlaeng haujlai bi, doih max- bang baez byaij gvaq henz conghcueng dahsau, cungj dingqnyi miz singfwen daj ndawrug de cienz okdaeuj, hot fwen neix yienghneix ciengq daengz: Ronghndwen okdaeuj ronghsagsag, ronghsagsag, siengj daengz daeggo gou youq ndaw lueglag; daeggo lumj ronghndwen byaij gwnzmbwn, byaij gwnzmbwn……”

Gyoengqde baez dingqnyi gij singfwen unqmenh swnhrwz youh coi vunz raemxda doek neix, bouxboux roxnyinh siliengz raixcaix, seizhaenx, cawz le gij sing lingzmax yiengj- doengdeng le, hix mbouj byawz nyaenxsim bae nyauj dahsau eu fwen.

Bi riengz bi, ngoenz gvaq ngoenz. Bouxdaeuz maxbang bienqbaenz goenggeq, dahsau hix bienq baenz mehmbwk lo. Miz baez he, daxgoeng doiq boux mehmbwk neix naeuz:“Gou yied bi yied geq lo, baezneix dwg gou baez ceiq doeklaeng daiq maxbang lo, hoeng, gou yaek cam mwngz gienh saeh he, couh dwg vihmaz dou daengz neix cungj dingqnyi mwngz ciengq hot fwen neix ne?” Mehmbwk hannaeuz: “Baez dingqnyi sing lingzmax, gou couh rox gyoengqsou ganjroen daengz gizneix lo, gou couh daegbied niemhgyaez daegmbauq, gou couh ciengq fwen, gou maqmuengh gij sing fwen gou ndaej riengz doih maxbang sou byaij haeuj ndaw lueg bae, hawj roenmingh daegmbauq dingqnyi hot fwen neix le, roxnyinh gou lij caj de dauqma, caemhcaiq muengh de haeuj ndaw fangzhwnz gou daeuj caeuq gou gangjgoj gangjriu.”

Sij aen gojgaeq neix baenz le gou cij ngeix, seizneix, mboujguenj ndawsingz roxnaeuz lajmbanj, gyoengq bouxcoz damzyoux, dingzlai vunz cungj yawjnaek cienzcaiz yawjmbaeu gamjcingz, miz cienz couh haq mbouj miz cienz nyienh gadog. Maqmuengh aen gojgaeq neix doiq gyoengqvunz dawz damzyoux dangguh guhcaemz, roxnaeuz hai bak couh naeuz “miz cienz miz ci miz ranzmoq cij haq” haenx miz di bangcoh.（sat）

Ronghndwen Ok-

daeuj Ronghsagsag

月亮出来亮汪汪

□ Luz Yuzgangh/陆如刚