Seizgan gvaq ndaej caen vaiq, baez yaep da, couh yaek daengz cieng lo. Gou muengh ndaej lumz gij saeh gaeuq, hoeng mizmbangj saeh hawj gou caen hoj lumz, gij saeh haenx cungj oemq youq ndawsim gou, baez siengj daengz gvaq cieng, gou couh hojsouh. Gou caeux couh siengj lwnh lo, danhseih mbouj rox lwnh naeuz byawz nyi, daxmeh, ngoenzneix gou gietdingh lwnh hawj mwngz, muengh mwngz dingqdingq.

Daengz cieng lo, daengz cieng lo, lwgnyez bouxlaux cungj angq hwnjdaeuj, ranz dou hix ityiengh, cingq comz youq itheij gwncaeuz ne. Gwnz daiz byaek caen lai ha, nohgaeq、byaseng、 nohbit、 gouyuz, baij youq gwnz daiz rim lo, daxmeh, mwngz lumj rox bienq mohsuz nei, yaengx hwnj bingz gojloz, gou vaiqvaiq yaengx aen cenj gou okdaeuj daengj. Meh, mwngz raix hawj dahnuengx caen lai, bingzdawz aen bakcenj lo. Mwngz hix raix hawj gou yienghneix lai couh ndei lo, ndaw sim gou naemj dwk, mwngz raix hawj gou lo, cij raix byongh cenj iq, gou ndoet ndaej song sam gaemz couh liux lo, gou dajbak dwk, cungj feihdauh neix hawj gou yied gwn yied ngah, ngamq yaengx aen cenj hwnjdaeuj siengj heuh mwngz dem di he hawj gou, yawjraen mwngz dawz doengh gij fwedgaeq gou ceiq gyaez gwn haenx cungj cienzbouh nip hawj dahnuengx lo, cingq riunyumnyum daeuq dahnuengx, doiq gou mbouj yawj mbouj cam，yawj daengz yienghneix, gou gwn yienghlawz cungj gamjdaengz lumj miz oen coeg hoz nei, ndwnj hix ndwnj mbouj roengz. Daxmeh, gou yawjraen mwngz yienghneix cungh dahnuengx gou caen dahoengz, muengh mwngz hix ndaej yienghneix doiq gou.

Fat cienznyok lo, mwngz dawz aen hungzbauh okdaeuj, yaengx hwnjdaeuj, yienzlaiz dwg hawj dahnuengx, gou hix youq henz ndang mwngz lo, hix mbouj raen mwngz hawj gou, gou nyaenx mbouj ndaej couh cam: “Gij gou ne?”Cij ndaejnyi mwngz aeu ndaeng han coenz“wng”, swnhfwngz daj ndaw daeh mbon ok mbaw ngaenz haj maenz, gveng youq gwnzdaiz, youh caeuq dahnuengx guh’angq dwk. enndaeng gou soemjsetset. Daxmeh ha, gou muengh mwngz hix lai ndiep gou, lumj mwngz ndiep dahnuengx yienghneix ndiep gou.

Dingq ndaejnyi daxboh heuh gou bae cuengq bauq lo, gou cij singj gvaqdaeuj, ww aa naeuz: “Mwngz……gyoengqsou bae ba, gou yaek yawj cunhcez lenzvuenh vanjvei. ”

Doengxhaemh gij gingjsaek baihrog dwg yienghneix gyaeu, ndaw densi gij cezmuz haenx dwg yienghneix mizyinx, danhseih gou hix mboujmiz sim yawj. Gyoengq vunz cungj naeuz: “Ndaw cieng ndaw cieng, vunzlaux simnyap, lwgnyez sim’angq. ” Hoeng gou angq mbouj hwnj, daxmeh mwngz rox lwi, gou mbouj dwg muengh haj maenz ngaenz haenx, cix dwg ngah ndaej gij raeujrub unqswnh mwngz!

(指导老师：潘丽云 )