Bineix, Cenzcouh Yen makdumh youh ndaej fungsou lo. Youq ndaw 8 moux reihmakdumh gvangqlangh haenx, aen makdumh hoengzrwgrwg, youh rang youh diemz, yinx haujlai bouxbuenq caeuq bouxyouz daeuj cawx. Gaiq reih 8 moux neix dwg gaiqreih Cenzcouh Yen Myaudouz Cin Sizdung Cunh nungzminz Ciengj Gveiswngh, Ciengj Gveiswngh youq Gvangjdungh dajgoeng seiz hag ndaej gisuz ndaem makdumh, bi’gvaq dauqma ranzmbanj bau le 8 moux reih daeuj ndaem makdumh, aenvih rox dajndaem gisuz, makdumh maj ndaej gig ndei. Haeuj Yenzdan daeuj, makdumh de laebdaeb ndaej gai lo, moix gaen makdumh gai 18 maenz. Ciengj Gveiswngh naeuz, de ndaem makdumh ndaej fouq le, lij aeu daiq vunz ndaw mbanj ndaem, son gisuz dajndaem hawj daihgya, caeuq beixnuengx ndaw mbanj itheij fatcaiz baenzfouq.