Aeya！Aenboi dauqdingq, raemx lij mbouj boeg okdaeuj. Neix dauqdaej vih gijmaz ne, hawj gou daj goek gangj daeuj.

“Ngoenzneix, raeuz guh aen gohyoz saedniemh ndeu, gig genjdanh, sou aeu sijsaeq yawj lo！”Vangz lauxsae naeuz. Ngoenzneix aeu guh gijmaz saedniemh ne？Vangz lauxsae riu dwk, de itdingh youh saj raeuz lo, gou siengj.

Vangz lauxsae dawz aenboi hoengq caeuq aenboi miz raemx rim haenx baij youq baihnaj dou, caiq dawz boi raemx haenx dauj daengz aen boi hoengq haenx bae, menhmenh dwk, aen boi hoengq haenx raemx rim yaek lae okdaeuj lo, seizneix Vangz lauxsae dawz mbaw ceij cwngfanghhingz ndeu goemq bak boi, aeu fwngzswix rod bingz, fwngzgvaz gaem aenboi menhmenh dawz aenboi dauqdingq gvaqdaeuj, caiq menhmenh cuengq fwngzswix bae. Gou siengj, Vangz lauxsae baez soeng fwngz, ceij haengjdingh doek roengzdaeuj, raemx hix lae okdaeuj. Yienghneix, gou doiqlaeng geij yamq. Hoeng gvaq yaep he, gou byaengq da baez yawj, mbaw ceij haenx mbouj doek roengzdaeuj, raemx hix mbouj lae okdaeuj. Nanzdauh Vangz lauxsae youq gwnz ceij cat gijmaz doxgaiq？Dou cungj gamjdaengz geizheih, doeklaeng, ginggvaq Vangz lauxsae gejnaeuz, gou cij rox, aenboi dauqdingq boidaej coh mbwn raemx mbouj lae okdaeuj dwg aenvih gij hoengheiq siengj haeuj ndaw boi bae, hoeng raemx youh siengj lae okdaeuj, song cungj ligliengh neix doxdingj couh dawz ceij geb youq cungqgyang, hawj mbaw ceij haenx nem youq bak boi mbouj doengh saek di.

Hihi, baezlaeng gou hix guh aen saedniemh neix hawj daeg- nuengx caeuq dahcej yawj, hawj gyoengqde rox gohyoz couh youq henz ndang raeuz.

（指导老师：刘海蕙）