Daxboh, mwngz yawj bien faenzcieng《Deihdoengh Ndawde Boh Caeuq Lwg》 gvaq lwi? Danghnaeuz mwngz yawj gvaq couh ndei lo. Ngoenzneix raeuz hag bien faenzcieng neix le, hawj gou gig gamjdoengh. Daxboh mwngz aiq mbouj rox, gou caen dahoengz Ahmandaz miz boux daxboh ndei ndeu, boh Ahmandaz caen rox gujli Ahmandaz lo.

Daxboh ha, gou daegbied ngah mwngz gujli gou, gou engqgya ngah mwngz gujli gou hag ndei suyoz.

Geiq ndaej aen haggeiz gaxgonq, gaujsi sat lo, lauxsae fat gaujgenj roengzdaeuj.

Caen ndei lo, yijvwnz 98 faen! Yinghyij 100 faen! Gou angq dwk lumj gip ndaej ngaenzdoek nei, dawz song mbaw gaujgenj cuengq youq gwnz gyangfwngz, boq rumz le hawj de mbin hwnjdaeuj. Itmienh boq rumz, ndawsim itmienh naemj: Suyoz lauxsae vaiqdi daeuj fat gaujgenj ba, maqmuengh go suyoz gou hix mauhgvaq 90 faen! Dwen daengz gij suyoz cingzcik gou, gou miz di najmong. Daj bigonq daxmeh bae diegrog guhhong le, mbouj ndaej seizseiz fujdauj gou yozsiz lo, gou gamjdaengz suyoz mbouj rox geijlai.

Suyoz lauxsae fat gaujgenj lo, “Banh Yilinz 80 faen!”Gou doeksaet yat, gyaeuj mbouj gamj ngiengx hwnj, naiqnueknuek.

Cuengqhag lo, gou caen mboujmiz sim ma ranz, hoeng, gaujgenj yaek dawz ma ranz hawj vunzlaux sij mingzcoh. Madaengz ranz lo, raen daxboh mwngz cingq cawj byaekcaeuz, gou mbouj gamj hai gaujgenj okdaeuj. Gwn haeuxcaeuz sat, gou lijdwg mbouj gamj dawz gaujgenj okdaeuj. Bingzseiz mwngz doiq gou gig yiemz, ca yozsiz gou gig gaenj, gou mizdi loek, gaujsi cingzcik mbouj lijsiengj seiz, song ceh da mwngz lumj duz roeggyaeujmeuz cim gou seiz, gou couh lau lo.

Boh, mwngz coi gou bae ninz lo, gou cijndaej sing iq doiq mwngz naeuz: “Boh, lauxsae ngoenzneix fat gaujgenj lo.” “Dawzdaeuj hawj daxboh yawjyawj.” Yijvwnz 98 faen, yinghyij 100 faen, mwngz angq lumj gip ndaej gaemz gim nei, dang gou naeuz lauxsae heuh bohmeh sij mingzcoh seiz, mwngz angqfwngfwng sij roengzdaeuj. “Lijmiz go suyoz ne?” Mwngz baez yienghneix cam, gou damj suk lo, vaiq fan okdaeuj, mwngz baez yawj 80 faen, najbyak sikhaek nyaeuq roengzdaeuj, song ceh da cim gij “✕” haenx, “cungj yingyungdiz neix cungj mbouj rox guh ma? Daez suenqsoq cungj mbouj rox suenq ma? 5 caeuq 0. 5 cungj faen mbouj ok……” Gou dinghdingh ndwn dwk mbouj gamj han saek coenz, neix mbouj dwg mwngz baez daih’it ndaq gou suyoz ca lo, gou dingq ndaej cungj lau lo.

Daxboh ha, gou rox mwngz muengh gou suyoz hag ndaej ndei, danhseih mwngz cungj yienghneix ndaq gou, hawj gou yied hag yied yaez, hawj gou hojyouq, siengj daengz Ahmandaz, de youq laj ranz lak, de geiqmaenh gij vah boh de, dwg boh de bingzseiz gujli de, hawj de yungjgi, cij ndaej daiq gyoengq doengzhag deuz nanh, miz boux daxboh yienghneix caen ndei.

Bineix daeuj, bingzseiz cungj dwk mwngz fujdauj gou yozsiz. Gou engq muengh gou ndaej hag ndei suyoz, engq muengh yozsiz cingzcik ak. Gou ma ranz guh daezmoeg seiz, miz seiz mbouj rox guh, cam mwngz mwngz cungj haenqrengz fok gou, hawj gou daegbied lau. Daxboh ha, gou daegbied muengh mwngz ndaej coengh gou, gujli gou, danghnaeuz bingzseiz gou guh daez suyoz seiz, mwngz ndaej menhmenh son gou, hozraez son gou, mbouj fok gou, yienghneix gou gamjdaengz gou beij Ahmandaz lij miz fuk!

Daxboh, gou rox mwngz dwg ndiep gou, muengh gou cingzcik ndei, danghnaeuz mwngz ndaej vuenh cungj fuengsik he, lai gujli gou, yienghneix mwngz couh dwg gwnz seiqgyaiq boux daxboh ceiq ndei haenx lo!

(指导老师：潘丽云)