Gou youq seiz sam nienzgaep, moix ngoenz cungj raen daeggo dahcej daengz gaibuhingz bae conjnae. Gou hix siengj hag, hoeng gou mboujmiz haizconjnae. Ngoenz ndeu, gou doiq daxneh naeuz：“Daxmeh, gou siengj hag conjnae.” Daxmeh naeuz:“Ndei ha! Ngoenzcog gou bae gai cawx haiz hawj mwngz ba!”

Ngoenz daihngeih, daxmeh cawx haiz dauqma, gou sikhaek daenj haiz, ngamq ndwn hwnjdaeuj, couh lumj boux laeujfiz nei vangh bae vangh dauq, gou lau dwk daengx ndang cungj saenz. Lijndei, yaepndeu couh ndwn maenh lo, ngamq yo din, laemx lo, caekhaex gou in dwk hawj gou da ok ronghrib, gou daej lo.

Gou gietsim hag rox conjnae, moix ngoenz cuengqhag le cungj daengz gaibuhingz bae hag. Daxmeh youq henz buenx gou, hoeng mbouj guenj gou baenzlawz hag hix conj mbouj rox. Dwg mbouj dwg fuengfap gou mbouj deng? Gou mbouj ndaej naengh deq dai. Gou ansim roengzdaeuj, sijsaeq yawj bouxwnq baenzlawz conj. O！Gou rox lo, yienzlaiz dwg baenzneix conj ha! Song ga aeu guh baenz cih bet Sawgun, ga ndeu gungj roengzdaeuj. Gou hag gih yiengh gyoengqde, conj ha conj! Gou conj ndaej lo！Gou ndwn conj mbouj laemx lo, siengj conj bae gizlawz couh bae gizlawz. Gou angq raixcaix. Daxmeh yawjraen gou yienghneix ak, couh buet gvaqdaeuj umj gou hwnjdaeuj, riu lo.

Gienh saeh neix hawj gou roxdaengz: Gunnanz lumj danzvangz, mwngz ak de couh nieg, mwngz nieg de couh ak.

(指导老师：李金帅)