Daxboh daxmeh, sou ndei! Sou ciengx gou hung, sou sinhoj lo. Gou nyinhnaeuz gou maj baenz hung, ndaej hawj sou vaiqvued, caemh hawj sou aeuqheiq. Gou miz haujlai vah siengj gangj hawj sou.

Gou dwg boux lwgnyez gig dingqvah ndeu, moix baez sou mbouj youq ranz, gou cungj dwg gag guh gij saeh cihgeij. Geiq ndaej miz baez ndeu, daxboh miz saeh caengz dauqma, daxmeh hix gyaban, gou boux ndeu youq ranz guh cozyez sat le, sou caengz dauqma, seizhaenx gou gig dungxiek lo, couh cihgeij cawj ngaiz, gwn liux daih’it baez ngaiz buenqndip mboujcug, doek- laeng anqseiz haeujninz. Sou dauqma, byaujyangz gou, seizhaenx gou ndawsim vaiqvued lumj rox mbin, doengxhwnz ninzndaek lij riu.

Gvaq caet bi le，sou couh son gou sauq ranz、swiq vanj. Seizneix gou rox guh haujlai hongranz，bang sou faendan hongranz. Dwg sou hawj gou bienqbaenz boux lwgnyez bouxboux gyaez byaujyangz he, docih sou.

Danhseih, sou mbouj hawj gou caeuq doengzhag guh baengzyoux，gangj dwg lau gou hag vaih. Gou mbouj laekgaek，gou rox faenbied saehcingz ndei rwix，sou cihgeij gap baengzyoux，gou vih gijmaz mbouj ndaej gap baengzyoux ne，nanzdauh gou youq ndawsim sou ciengxlwenx mbouj majhung ha? Maqmuengh sou hawj gou swyouz di，lai di lijgaij caeuq cihciz gou.

Daxboh daxmeh, gou itdingh guh boux lwgnyez gvai he，maqmuengh sou vuenyungz vaiqvued!

（指导教师：覃 羽）