Ndaej naengh youq ndaw gyausiz ronghsagsag haenx dingq lauxsae hwnjdangz, gou gamjdaengz vuen- yungz; ndaej caeuq gyoengq doengz- hag itheij youq gwnz diegnywj guh- angq, gou gamjdaengz vuenyungz; ndaej cing fwngz daxboh daxmeh youz gai, gou hix gamjdaengz vuenyungz. Hoeng, gienh saeh fatseng youq henzndang gou haenx, engq hawj gou roxnyinh gij feihdauh vuenyungz, neix couhdwg seiqgyaiq lengqlengq cungj miz gyaez！

Ranznden gou miz boux dahcej ndeu, heuh Banh Swhdingz, cib bi gaxgonq daxboh de dai lo, daxmeh vut de bae gizgyae haq lo, dahcej cijndei caeuq daxgoeng daxbuz nienzgeij laux lij miz bingh haenx itheij gvaq saedceij. Ndawranz gungz dwk haeux gwn cungj cadi mboujmiz, daxgoeng daxbuz gyangz naek gyangz naiq, caegcaeg uet raemxda, gyoengqde naeuz lij ndei miz dahlan iq neix, mboujnex gyoengqde cungj mbouj siengj lix lo. Dahcej dwg gij maqmuengh daxgoeng caeuq daxbuz lix roengzdaeuj haenx.

Dahcej daengz nienzgeij hwnjhag lo, daxgoeng baenz ngoenz daiq bingh bae guh lingzgoeng ra ngaenz, doeng comz sae comz cij cengqgengz soengq de doeg daengz sam nienzgap, hoeng, 2004 nienz haggeiz daih’it caiqhix mboujmiz banhfap soengq dahcej hwnjhag lo. Daxgoeng cingq haemz- mingh, ndaw hagdangz cienzdaeuj siusik ndei, guekgya saedhengz “song mienx it bouj” cwngcwz: Daj ngoenzneix hwnj, gyoengq hagseng siujyoz caeuq cuhcungh doegsaw caiq hix mbouj yungh gyau ngaenzsaw caeuq ngaenz yozfeiq lo! Dahcej youh ndaej doegsaw lo. Hoeng liuh mbouj daengz, bihaenx seizhah, mbanjranz raeuz lienz doek sam ngoenz fwnhung, aen ranzciengz dahcej deng doemq lo, gyoengqde cijndei sien gyonj bae ranz caencik youq. Ndaw mbanj goeng duicangj rox le, daengz cin minzcwngban ra ngaenz bujcu, bang ranz dahcej hwnq liux song fungh ranz. Gyoengq caencik caeuq vunz ndaw mbanj lij soengq haeux caeuq doxgaiq ngoenzyungh daeuj, miz- mbangj lij soengq dengi caeuq gyahgi. Dahcej caeuq daxgoeng daxbuz de ndaej youq ranz moq, angq lumj gvaq cieng nei.

Dahcej baenz hwnj cuhcungh lo, daengz cuhcungh doegsaw aeu youq ndaw hag gwn youq, swnghhozfei bae gyawz ra ne? Couh yaek daengz haihag lo, daxgoeng de dawz gij doxgaiq ndawranz ndaej gai haenx cungj gai liux lo, lij comz mbouj ndaej geijlai ngaenz. Daengz ngoenz haihag lo, daxgoeng soengq dahcej bae daengz hagdangz, fwngz saenzdiddid dwk daj ndaw daeh mbon ok dieb ngaenz mbangmbe ndenq hawj lauxsae, naeuz: “Lauxsae, gou cijmiz di cienz neix lo, sien gyau dineix, mbouj gaeuq deq gvaqlaeng miz le caiq gyau, ndaej lwi?” Lauxsae riuyumyum dwk naeuz: “Daxgoeng, mbouj yungh gyau lo，seizneix guekgya mboujdanh mienx ngaenzsaw caeuq yozfei, gij hagseng ndawranz saedceij miz gunnanz haenx, lij ndaej ngaenz bujcu ne. Moix bi Nanzningz Si Cwngfuj cungj vih minz banh saedsaeh, bued cienz roengzdaeuj coengh gij hagseng swnghhoz gunnanz haenx dem. Raeuz liujgaij daengz Banh Swhdingz miz gunnanz lo, de mboujdanh ndaej swnghhoz bujcu, raeuz lij coengh de swnhcingj gwnz sevei bangcoengh, daengzseiz lijmiz gij vunz simndei daeuj bang- coengh……” “Caen mbouj yungh gyau lo?” Daxgoeng mbouj gamj saenq dujrwz cihgeij, raen lauxsae ngaek- ngaek gyaeuj, daxgoeng angqdwk cig gangj: “Ndei ha! Ndei ha! Caen docih dangj caeuq guekgya lo! Caen docih gyoengq lauxsae sou lo! Swhdingz, mwngz aeu roengzrengz doegsaw, bauqdap aencingz dangj caeuq guekgya ha!” Dahcej hix angq dwk ngaekngaek gyaeuj, “wng, daxgoeng, mwngz cuengqsim, gou itdingh roengzrengz hagsib, yungh cingzcik ceiq ndei daeuj bauqdap gyoengqde.”

Dahcej caen mbouj hawj dax- goeng saetmuengh, de itcig roengz- rengz hagsib, moix bi cungj ndaej haujlai ciengjcang, seizneix dahcej gaenq daengz Vujmingz Gauhcungh doegsaw lo, de gangj:“Gou ndaej maj youq aen seiqgyaiq gizgiz cungj miz gyaez neix, gou itdingh ndeindei hagsib, baezlaeng vih gensez vuenyungz Cungguek okrengz.”

（指导教师：刘孟婴）