Fungsanh Ndaem Gosangh Ciengx Nonsei Cingzcik Yienhda

来源：广西民族报网

发布时间：2025-03-04

Mboengqneix, Fungsanh Yen Nungzyez Nungzcunh Giz lwnh vunzlai rox, daengz 2024 nienzdaej, Fungsanh Yen ndaem gosangh ciengx nonsei cingzcik yienhda. Daengx yienh ndaem gosangh najdieg miz 4.3 fanh moux, ciengx nonsei 11.31 fanh mbaw, baenz reh 4750.18 dun, demlai 10.62%, baenz cienz 2.66 ik maenz, 2.1 fanh boux vunz lajmbanj ndaej leih, ranz ciengx nonsei bingzyaenz moix ranz ndaej 2.8 fanh maenz ngaenz roengzdaeh, baenz gaiq rengz youqgaenj doidoengh lajmbanj saenqhwng.

2024 nienz, Fungsanh Yen haenqrengz hwnqguh giekdaej sezsih canjnieb ndaem gosangh ciengx nonsei. Bued gij ngaenzcienz doxriengz cunghyangh caizcwng 1534 fanh maenz, coenghrengz nungzhu hwnqguh ranz hung ciengx nonsei 11 fanh bingzfanghmij, daengx yienh ranz hung ciengx nonsei najdieg daengz 25 fanh bingzfanghmij. Doengzseiz, guhsat gaijguh 1 fanh moux suen gosangh maj mbaw noix, suen gosangh ndaem moq 283.4 moux.

Vunzcaiz gungganq fuengmienh, Fungsanh Yen roengzrengz cujciz guekgya gohgi dwzbaidonz cwngzyenz bae daengz dieg ndaem gosangh ciengx nonsei, son’gyauq dinfwngz dajndaem dajciengx, guhsat 22 geiz son’gyauq dinfwngz, son’gyauq boux ciengx nonsei 1588 vunzbaez、yienh yangh gisuz guzgan caeuq bouxak ciengx nonsei 75 boux, doigvangq dinfwngz semzndaem “gosangh+gomiuz” 80 moux.

Linghvaih, Fungsanh Yen mboujduenh doinyoengx cauhmoq dinfwngz ndaem gosangh ciengx nonsei. Yinxhaeuj doigvangq 410 dauq gveijdau gueng nonsei mbaet rengz caeuq gyaqhwnjcuz swdung、 10 fanh lai benq cuzbaenzgek yienghmoq、 5 aen fagcab gosangh yienghmoq caeuq 2000 aen gyaqyinhreh yienghmoq; doigvangq 5 hangh dinfwngz, baugvat dinfwngz gaijguh suen gosangh maj mbaw noix、 dinfwngz vunz nonsei doxliz daengj; yinxhaeuj 5 aen binjcungj ndei, hwnqbaenz 610 moux suen gosangh binjcungj moq guhyiengh, ciengx nonsei Gveicanz 8 hauh 2500 mbaw daengj.

(Veiz Yigyangh)

编辑：黄誉琦复审：复审：黄慧华终审：蒙树起