Dinfwngz Guh Lungzfiengz Saeceijfiengz Dungcuz

来源：广西民族报

作者：Maj Veiyungz comz hoiz

发布时间：2020-08-19

Vunzmbanj mwh seizhoengq lai lienh foux lungzfiengz.

Gyoengq beixnuengx ndaw mbanj angq foux lungzfiengz.

Daegmbauq bae ndaw rug senj aeu fiengznyangj.

Gij fiengznyangj haeuxcid henjrwgrwg haenx san guh lungzfiengz ceiq ndei.

Vunzmbanj caezsim cug aen goetgyaq lungzfiengz.

Mehmbwk ndaw mbanj foux lungzfiengz caemh ak bw.

Gij duzdaek、duzngwz、duzgungqlungz、roeggungjcoz、duzgaeq aeu fiengznyangj san haenx.

Boux swnjcienz dinfwngz san lungzfiengz Vangz Yi bonjsaeh ak.

Saeceijfiengz baijyienj vifung mbaenj fuk.

Vunzmbanj humx naengh youq henz naz san gyaeplungz.

　　Dinfwngz guh lungzfiengz saeceijfiengz Dungcuz youq Lungzswng dieg beixnuengx Dungcuz comzyouq haenx riuzcienz. Gij dinfwngz guh lungzfiengz saeceijfiengz neix gig ak, lumj doenghduz caen nei. Bi 2010, Dinfwngz guh lungzfiengz saeceijfiengz Dungcuz senj haeuj buek daihsam swcigih feihvuzciz vwnzva yizcanj mingzloeg.

　　Guh lungzfiengz saeceijfiengz Dungcuz miz geij bouh: Genj ngoenzndei bae siu yieng caeqbaiq; genj aeu gij caizliuh lumj fiengz haeuxcid、faexcuk、diuzgaeu、diuz- faex、mbawbaengz daengj; veh ndei gij doz duzlungz、duzsaeceij; ciuq gij doz veh ndei ma dajsan. Gij fuengfap dajsan lungzfiengz、saeceijfiengz miz song cungj. Cungj daih’it dwg loq san: Aeu diuzfaex roxnaeuz diuzgaeu ma guh gyaq caeuq gak aen hoh, dawz gij faexcuk lieb baenz diuzduk le, aeu duk ciuq cikconq san baenz gij goetgangq aenbaujlungz、gyaeuj- lungz、ndanglungz、gyaeujsaeceij daengj. Cungj daihngeih dwg saeq san: Fap sanmengq dwg genj gij fiengz haeuxcid ndei haenx ma san baenz gij yiengh mengq; fap sanmbinj couhdwg aeu fiengz haeuxcid ma san baenz samgak、seiqfuengcingq、seiq- fuengraez、luenzgyaeq daengj, san baenz duzlungz gij doxgaiq hung’iq mbouj doengz haenx; fap cug nyib cix dwg dawz fiengz haeuxcid cug baenz gaem baenz gaem iq le, riengz baihlaeng aenndang saeceij song mbiengj nyib roengzbae, byairiengz haeuxcid coh baihrog couh baenz saeceij lo, gyaeujganj cix aeuma guh baihlaeng; dawz gak aen gak gaiq san hwnjbae couh san ndaej lungzfiengz、saeceijfiengz okdaeuj.

　　《Mbanj Gvangjnamz Ceiq》geiq, guh lungzfiengz daj bi Gyahging Cingciuz couh miz lo. Doenghbaez, gij vunz Dungcuz ciuhciuh cungj dajndaem, gomiuz ciengzseiz deng duzdaek gwn roxnaeuz deng rengx. Gyoengqvunz nyinhnaeuz duzlungz dwg gij vaqndang bouxsaenz, de ndaej heuh fwn rumz daeuj daengz、cawz seuq duzdaek gwn gomiuz haenx. Gyoengqde couh aeu duk、fiengz、diuzgaeu daengj cug san baenz lungzfiengz le, youq ngoenz liggaeuq loeg nyied coloeg bae loengh saeceij, youzbyaij doenghnaz. Ngoenzhaenx, gyoengqvunz cungj doxcomz youq henz naz, siu yieng caeqbaiq diendeih le, cibgeij boux vunzsai gingz dwk duzlungzraez byaij gvaq ndawnaz gyaeujreih. Bouxdauh doq namngon, duzdaek daengj doenghduz doq mbinfoenfoen, mbin daengz gwnz ndang duzlungz bae. Gyoengqvunz couh dawz duzlungz bae henz dah, diemj feiz citcak, yienghneix couh ndaej cawz non- haih、bauj gomiuz fungsou. Aen fungsug neix couh yienghneix ciuh cienz ciuh lo. Moix bi loeg nyied coloeg, gyoengq lwglan Dungcuz cungj daenj gij buhvaq gyaeundei de, fouxloengh lungzfiengz、saeceijfiengz, diuq fouxdohyeh, danzciengq fwen- bizbaz, yienhciengz nauhyied hix angqyangz.

　　Guh lungzfiengz、saeceijfiengz mboujdan baijok le gij fungsug vwnzva Dungcuz, vanzlij yienh’ok gyoengqvunz vih fungsou angqyangz, gyaepgouz ndwenngoenz vuenyungz haenx.

编辑：韦亦玮