Dinfwngz Guh Bitlwedmeiq Cenzcouh

来源：广西民族报

作者：Maj Veiyungz comz hoiz

发布时间：2020-08-14

Vunzlai doxcanj cimzgwn bitlwedmeiq.

Gugcawj bitlwedmeiq gaxgonq yaek bwh ndei liuh.

Vunz ranghdieg Vwnzgyauz Cin Cenzcouh ciengx bit ndaej fatcaiz.

Hingndip、gyaeujsuenq、nohmou hajgyap doengh gijneix noix mbouj ndaej bw.

Aeu rekhang caeuq fwnz gugcawj feihdauq engq ndei.

Cungj bitraemx gyaeuj iq nyauj saeq dangdieg rangh Vwnzgyauz、Myauzdouz youq ndaw naz ndaw rij ciengx haenx.

Gaj bit do lwed gaxgonq sien caeng miz raemxmeiq gag iep gonq.

Bouhloh gugcawj daih cienz daih swnjciep roengzdaeuj.

Danghnaeuz gya di hing、lwgmanh、gyaeujgiux iepsoemj haenx engq soemjvan.

Bouxswnjcienz dinfwngz gugcawj bitlwedmeiq Ciengj Fuzcaiz sonyinx daeglwg gugcawj.

Baengzyoux humx naengh henz rek bitlwedmeiq deplaeuj.

　　“Loeg nyied loeg, noh bit unq, cauj lwghaemz, caemj lwedmeiq”. Gij lizsij bitlwedmeiq Cenzcouh gig nanz, gij vunz Cenzcouh ca mbouj geij bouxboux rox loengh cungj byaek neix. Youq rangh baihbaek Gvangjsih raeuz, baeznaengz gvaq cieng roxnaeuz cingjhek, gwnz daiz yaek miz deb bitlwedmeiq ndeu cij ndaej.

　　Bitlwedmeiq Cenzcouh ceiq caeux daj Ciuzcin ndawgyang couh youq Cenzcouh Yen Vwnzgyauz Yangh hainduj miz, daengz seizneix gaenq cien roek cien caet bi lo. Cienzgangj, mehyah Ciengj Vanj Mauzsi daiq daeglwg sam de ma daengz Cenzcouh diegcoj, dai le cix cangq youq Vwnzgyauz Yangh. Doeklaeng, hen moh Mauzsi couh baenz gij gvigawj dangdieg cienz roengzdaeuj. Mbat ndeu, liggaeuq loeg nyied coloeg, vunz gizhaenx yaek aeu gaj bit caeq boux saenzhaeux, boux henmoh maranz haemh lai lo, mbouj caengz ndaej gibseiz gyaux raemxgyu, baez simgip couh loek dawz vanj raemxsoemj he dangguh vanj raemxgyu, de doq dawz lwedbit rwed roengz vanj raemxsoemj bae lo. Baez cawj ne, nyouq daengz gij nohbit ndaw rek miz cungj heiq soemj cuenq raixcaix he cix laeng lo. Boux henmoh dauq sonx feiz hamq haenq dwk, cuengq vaceu、gosijsu daengj liuhhom yaek bae goeb gij heiq soemj haenx. Mboujliuh yied cauj yied hom, hwnj rek le baez cimz engqgya feih gvaq gij fapcawj wnq bae. Seizneix, vunz Cenzcouh vanzlij loengh ok lai cungj byaek daeuj, lumjbaenz lwghaemz cauj lwedbit、miuzbiek cauj lwedbit、duhhaeuxlanq cauj lwedbit、duhdoem cauj lwedbit、lwgraz lwedbit daengj.

　　Bitlwedmeiq yienznaeuz yungz- heih guh, hoeng gij fapcawj de cix gangjgouz dangqmaz: Senj liuh、boiq liuh、dwk feiz rem numq caeuq cawj geijlai nanz, sam bouh neix mbouj ndaej rubrab saekdi, daegbied dwg dwk feiz rem numq caeuq cawj geijlai nanz ceiq youqgaenj. Baez cauj ne, ca buenq faencung gij feihdauh de couh mbouj doengz lo. Loengh cungj byaek neix ne, aeu cungj bit mazdoj ga iq gyaeuj iq Vwnzgyauz diegde haenx ma loengh ceiq baenz gwn, itbuen senj gij bit oiq miz song sam gaen、seiq ndwen hung haenx. Mwh gaj bit couh dawz gij lwedbit do roengz vanj raemxsoemj daj ndaw biengx iep byaeksoemj daek okdaeuj haenx bae, gyaux yinz cuengq dwk. Baez cawj ne, deq aen rek ndat le, gij youz youq ndaw rek yiengj bubbub babbab le couh dawz nohbit、daeuhseih、hing、gyaeujsuenq、noh samcaengz caeuq lwgmanh laebdaeb cuengq haeuj ndaw rek bae. Gek geij faen cung couh biengj farek aeu faggucanj ndau baez he, deq nohbit cawj cug le youh cuengq gij byaekboiq roengzbae doxcaeuq cauj. Cauj le aiq miz diemj cung ndeu couh dawz lwedbit raix roengzbae, caiq gya di gosijsu caeuq lwgraz, rek bitlwedmeiq rangfwng- fwng ndeu couh cawj ndaej lo. Gij nohbit ngamq daek hwnj rek haenx, homfwtfwt, ndaem dwk ronghsaksak lumj yisuzbinj nei.

编辑：韦亦玮