Ciet Cuengqdaeng Vuengzyauz - 广西民族报网

Ciet Cuengqdaeng Vuengzyauz

来源：广西民族报

作者：Maj Veiyungz comz hoiz

发布时间：2020-08-14

Luengqhongh caeuq gyang dah, daeng’va ronghyabyab.

Vunzlai ndwn youq henz dah gwnz giuz yawj daeng’va.

Ngoenzciet, gyonglaz gyukgyad sing bauq haprwenz.

Vunzlai angq yawj daeng’va caemh nyaengq cai daengduenz.

Ngoenzde, hawgaeuq luengqhongh daeng’va venj doh.

Daeng’va naeng makbug vaij gvaq gyang dah.

Ngoenzciet, cezmuz biujyienj lai cungj lai yiengh.

Dahniq guh daeng’va dem angqyangz.

Ruzva rag daeng’va naeng makbug gvaq gyang dah.

　　Youq moix bi liggaeuq caet nyied cibseiq、cibngux, gyoengqvunz Hawgaeuq Vuengzyauz Hocouh cungj gag youq Dahyauzgyangh banh aen hozdung cuengq daengmakbug ndeu, mbaenj gouz fwn raemx ndaej yinz, biengz dingh vunz onj.

　　Baih saebaek Vuengzyauz bya sangvid lingqlauq de, Dahyauzgyangh couhdwg daj gizhaenx daeuj lo. Seizfwn daeuj daengz ni, raemxrongz caemh daeuj lo, ciengzseiz miz ranz doemq, doenghduz caeuq vunz daimboet daengj, gyoengqde couh nyinhnaeuz dwg gij fangzbaed ndaw dah loengh okdaeuj. Yienghneix, youq liggaeuq caet nyied cibseiq、cibngux doengxhaemh, gyoengqde couh cuengq daengmakbug daeuj caeqbaiq goengsaenz ndaw dah. Daengmakbug couhdwg gat caengz naeng gyaeujgaenq makbug okdaeuj bae, youh youq gwnz makbug baek yieng lab, sam aen makbug guh aen cuj ndeu, caiq aeu faexcuk saeq doxdam baenz samgak, aeu cag cuj ndeu cuj ndeu cug roix hwnjdaeuj, couh bienqbaenz duz lungzgim miz ngeihcib geij meij raez lo.

　　Hozdung hainduj, gij vunz dangdieg caeuq vunzhek cungj doxciengj youq gwnz naeng makbug baek yieng baek lab. Gij daeng- makbug couh youq Dahyauzgyangh riengz raemxdah lae baeyekyek, seizneix sing bauq yiengjbiba, sing gyong roqdumdum, henz dah hix miz haujlai vunz humx yawj. Gij ruz vaij youq baihnaj haenx dwg doih roq gyong caeuq boq yozgi, gyoengqde aeu loxlez boq gij go angqyangz haenx, youq gwnz dah youzyekyek. Gij ruz riengz youq doeklaeng cix dwg doih loengh saeceij, gyoengq lwg- mbauq riengz sing gyong bae doengh foux aen’gyaeuj saeceij, vih gij minzsug hozdung Vuengzyauz dem le deihfueng daegsaek. Aen’gyaeuj daengmakbug miz aen “daeuzdaeng” ndeu, de dwg aeu faexcuk caeuq benjfaex ma guh baenz, aeu ceij haj saek ma biujnem hwnjdaeuj. Daeng- makbug lae daengz gizlawz, gij vunz henz dah couh cit bauq bae ciep de. Gwnz mbwn Vuengzyauz deng bauqva ingjrongh dwk ndeiyawj dangqmaz, bauqva hix caeuq gij lab yieng gwnz dah ronghmyabmyab haenx doxingj doxdaengh, swnjciep baenz benq ronghlwenq migda ndeu. Dahyauz- gyangh deng cang baenz duz lungzgim ronghsagrag haenx, cienfanh aen daeng geiq miz gij hohfuk ndei caeuq maqmuengh vunzlai.

　　Cuengq daeng hozdung sat le, gyoengq lwgmbauq lwgsau cungj diuq roengz dah bae ciengj aeu gij daengmakbug, ciengj daengz le cix dawz ma ranz bae caeuq vunz ndaw ranz doxfaen, dingqnaeuz bouxlawz gwn le bouxlawz couh “miz lwg”, hix ndaej souhyienz.

编辑：韦亦玮