Aen Fungsug Baiq Sah Bouxdung - 广西民族报网

Aen Fungsug Baiq Sah Bouxdung

来源：广西民族报

作者：Maj Veiyungz comz hoiz

发布时间：2020-07-24

Vunzlai Dungcuz ram buzcoj “Sahsui” bae cetcunz gak mbanj.

Ngoenzciet loenghfoux vaizcin muengh ndaem ciengx fungsou.

Vunzlai faen “souh bingzan” caez gwn.

Vunzlai Dungcuz ciep “Sahsui” haeuj mbanj.

Buzcoj Dungcuz “Sahsui” haeuj mbanj gvaq ranz soengq fuk.

Vunzmbanj soengq hoengzbau hawj “Sahsui” mbaenj fuk.

Ngoenzciet daemcuk ceizet dakdaih beixnuengx.

Vunzmbanj nyaeb aeu feizgyoq ndaw cauq maranz gouz daihdaih hwnghoengh.

Vunzlai Dungcuz loenghfoux lungzfiengz muengh gomiuz maj noengq.

Bouxhek caeuq vunzlai Dungcuz caemh gwn ngaizdoxrop.

Gij hohfuk “Sahsui” ranzranz soengq daengz.

　　Gyoengq beixnuengx Bouxdung daj ciuhgeq couh nyinhnaeuz: Bouxdung wngdang ciengzseiz baiq “Sah”, mboujlwnh saeh hung roxnaeuz saeh iq. Baiq Sah couhdwg caeqbaiq bouxsaenz “Sahsui”. Haenx dwg Vahdung yaemhoiz gvaqdaeuj, eiqsei dwg buzlaux、buzcoj gig miz diegvih de. Moix bi liggaeuq ngeih nyied daih’ it aen ngoenzmaux couh dingh guh ciet baiq Sah Bouxdung lo, haenx caemh dwg aen ciet gyoengq beixnuengx Bouxdung cawz ok gvaq cieng le ceiq hoengh ndeu.

　　“Sah” couhdwg Dahging, boux yinghyungz ciuhgeq Bouxdung youq ndaw cienzgangj haenx. Cienznaeuz Dahging lai mbat daiq gyoengq vunz Bouxdung dingjhoenx gij vunzdig daeuj ciemq dieg gyoengqde haenx, yungh gij mingh swhgeij vuenh ndaej gij bingzan gyoengq vunz Mbanjdung. Vunzlai Bouxdung couh heuh de guh “Sahsui” roxnaeuz “Sahmaj”, gak mbanj vanzlij guh aen daizbaiq bae cienmonz baiq “Sah” daeuj geiqniemh de. Haenx couh cugciemh bienq baenz le dauq yizsiz caeqbaiq caeuq daizbaiq guenjleix ndeu lo. Baeznaengz ndaw mbanj cungj baij vunz cienmonz guenjleix daizbaiq, coit、cibngux cungj aeu bae siu yieng gingq caz, vunz diegwnq mbouj ndaej haeujbae. Mbanjdung moix bi cungj yaek banh mbat daihcaeq ndeu, haenx dwg gij hozdung mbanjdung ceiq goenggingq ceiq hoengh haenx. Daengx mbanj vunzlaux lwgnyez bouxcoz cungj yaekaeu comz youq baihnaj daizsaenz “Sahsui” caeqbaiq gonq, gyoengqde doxcomz youq henz “Daizsah”, deq goengdauh Bouxdung diemj feiz go’ngaih siengcwngh vuenyungz gitleih haenx ndaej le, couh gag daiq ma ranz.

　　Ngoenzciet, cawzok hanghmoeg conzdungj lumjbaenz ram Sah youz haw, yizsiz caeqbaiq daengj, vanzlij banh gij hozdung gig miz daegsaek Mbanjdung haenx lumjbaenz boq venz gingq laeuj ciep hek, baij ok gijgwn Bouxdung, haeuxcuk bingzan miz fuk “Sah”, hoihlaeuj doxgyoeb Bouxdung daengj. Ram Sah youz haw dwg ciet baiq Sah bouh ceiq youqgaenj haenx. Song boux vunz ram duzyou “Sahsui”, gyoengq mehmbwk rap doxgaiq, fwngz gop haeuxnaengj, riengz canghcaeq ciuq gonqlaeng bae seiqhenz gak aen Mbanjdung byaijdin lokfuk. Byaijdin sat le, gyoengq vunz dangdieg vanzlij biujyienj doenghgij cezmuz, lumjbaenz caij din venz、diuq foux Bouxdung, nauh vaizcin daengjdaengj, haenx yienh’ok gij fungsug caeuq feihdauh Bouxdung, hawj vunz yawj dwk dava bae. Gyoengq vunz eu fwen diuqfoux, ciengzmienh gig nauhyied.

　　Sahsui ganqciengx le Bouxdung, yingjyangj le Bouxdung, de dwg diuzsaeu aen mincuz neix, engqgya dwg cungj cingsaenz vwnzva aen minzcuz neix. Gij hozdung “baiq Sah” mboujdan dwg cungj biujyienh coengzbaiq Sah ndeu, caiqlix dwg cungj biujyienj coengzbaiq boux cojgoeng Dahging hoenx hingz vunzdig ndeu.

编辑：韦亦玮