Ciet Ruzlungz Sinduh - 广西民族报网

Ciet Ruzlungz Sinduh

来源：广西民族报

作者：Maj Veiyungz comz hoiz

发布时间：2020-07-10

Ruzlungz comz gyangdah, doxdax yaek hainduj.

Cengciengj bae gonq.

Eu fwen angqhoh ngoenzciet ruzlungz doxdax.

Gwnz ruz bouxboux cungj caenhrengz.

Gyoengq bouxvadruz baiq Yahcoj.

Lumhlumh gyaeujlungz aeu di fukheiq.

Gwnz giuz henz dah vunz lai vunz daih.

　　“Ndaw dah ruzlungz doxdax mbawgeiz mbinyag vunz lai vunz daih, baihnamz ngoenzciet sing gyong laz goksad lumj byajraez rongxmaenj”, miz canghsei yienghneix haenh gij ruzlungz Sinduh. Sinduh Cin youqlaeng baihdoengnamz Hocouh. Dingqnaeuz, gij lizsij ngux nyied co’ngux ruzlungz doxdax daengz seizneix gaenq miz bak lai bi lo. De gaenq bienqbaenz dangdieg aen dijyuz hozdung gig miz daegsaek ndeu.

　　Moix bi liggaeuq ngux nyied coloeg, gyoengqvunz Hocouh Sinduh、 Buhmwnz、 Yinzyi sam aen cin cungj gag cujciz vunzlai youq Dahho- gyangh hawgeq Sinduh banh aen hozdung ruzlungz doxdax haenx. Moix bi cungj miz cib lai aen ruzlungz daeuj camgya doxdax. Hozdung lij caengz hainduj, gyoengq senjsouj cungj aeu bae “baiq Yahcoj” gonq, mbaenjfuk baujyouh gij senjsouj ruzlungz bingzan, baujyouh dangdieg fwnraemx ndaej yinz, gyoengq- vunz ndwenngoenz vuenyungz. Gijneix caemh bienqbaenz aen yizsiz Sinduh daj ciuhgeq ciepcienz daengz seizneix ndeu.

　　Ruzlungz doxraez aiq miz ngeihcib mij, gungh miz ngeihcib aen daengq, moix aen daengq ndaej naengh song boux vunz, aen ruzlungz ndeu ndaej naengh ngeihcib daengz samcib vunz. Ruzlungz song henz veh miz bya、 gungq、 baeu daengj mbawdoz, gyaeujruz an aen gyaeujlungz ndeu, rieng ruz cix an aen doxfaex lumj rieng lungz nei. Vad ruz seiz, boux youq gyaeujruz guh bouxroqgyong haenx, boux youq gyang ruz cix roq laz, boux youq rieng ruz cix guh bouxgaemdox haenx. Riengz gij banj sing gyong laz，bouxvadruz haenqrengz vad gaiqvad, mwngz laeh gou gyaep, ciengzmienh gig hungmbwk. Seizhaenx, gij ranzlaeuz、honghgai caeuq aen Giuzsinduh song henz Dahho’gyangh haenx cungj miz haujlai vunz ndwn dwk humxyawj.

　　Ngoenz “vad sokgyaeuj” couh ndaej vad ok “gapcaen ruzlungz”. Aenvih mbangj boux daj lohraemx daeuj haenx ranz haemq gyae, youq Sinduh doxdax sat le ngoenzhaenx doq ma hix mbouj bienh, ndigah gij mbanj song henz dah couh louz gyoengqde roengzma gvaqhwnz, ngoenzlaeng gwnhaeux imq le cij baema. Gij cingzngeih daihgya menhmenh couh gyalaeg lo. Aen sibgvenq neix couh itcig cienz daengz seizneix, couhdwg “gapcaen ruzlungz” vunz dangdieg ciengzseiz naeuz haenx. Gij mbanj gapcaen ruzlungz haenx ndei lumj beixnuengx nei, gyoengqde doxbang doxcoengh, caezsim baenaj, doxbeij bae gonq. Gijneix couh cienzciep cingsaenz ruzlungz Sinduh.

编辑：韦亦玮