Hawfwen Bouxcuengh Lungzlinz - 广西民族报网

Hawfwen Bouxcuengh Lungzlinz

来源：广西民族报

作者：Maj Veiyungz comz hoiz

发布时间：2020-07-01

Fwencuengh haeuj hagdangz, lauxsae hagseng angq lienh fwen.

Ciengzmienh hawfwen nauhyied hungloet.

Bang nyeziq ndeu caemh camgya hawfwen doxdax.

Sing fwen goksa haprwenz.

Mbauqsau biujyienj fungsug aemqbawx Bouxcuengh.

Baijyienj doiq fwen gyauyoux.

Dahniq eu fwen sing sepset.

Vunzlai comzhumx dingq fwen.

Doiq fwen haenqhwd sing mbouj daengx.

Baijyienj doiq fwen angqhoh.

　　Hawfwen Bouxcuengh Lungzlinz, gwnzbiengz heuhguh hawfwen “deng lo deng lo na”, dwg cungj hozdung bouxcoz Bouxcuengh Lungzlinz Gak Cuz Swciyen guhangq caeuq doxgyau ciengzseiz banh. Gij hawfwen daeuz youq Lungzlinz, youq gij mbanj Bouxcuengh caeuq Bouxyaej henz hamq Dahnamzbuenz hwng riuz raixcaix. De daj Bwzsung couh fat hwnjdaeuj lo, daengz Mingz- ciuz engq hwngvuengh. Bi 2010, hawfwen Bouxcuengh Lungzlinz ndaej senj haeuj buek daihsam swcigih gaep feihvuzciz vwnzva yizcanj mingzloeg.

　　Hawfwen “deng lo deng lo na” miz lai cungj hingzsik, faen baenz sam cungj, lumjbaenz hawfwen doxgyau、hawfwen doxaeu caeuq hawfwen goenghoh. Hawfwen dox- gyau dwg eu fwen haenh gij dieg gyaeundei lai, hawfwen doxaeu cix dwg eu fwen okhaq nem fwen aeubawx, hawfwen goenghoh couh- dwg eu fwen hoh haeuj ranzmoq caeuq fwen hohlaeuj. Hawfwen youz ndawranz youq ranzding、gyanghongh roxnaeuz henz feizgiengz banh. Itbuen daengz banhaemh cij hainduj, youz goengcawjgya daeuj dingh gij seiz he dwg nanz roxnaeuz dinj. Doiqfwen dwg bouxsai caeuq mehmbwk doxdoiq, ceiq noix mbiengj aeu miz song boux vunz; caemhcaiq youz vunzlaux bae guenj, bouxlawz cungj mbouj ndaej saetlaex. Doiq- fwen faen bouxcawj eu nem bouxhek eu. Itbuen bouxcawj eu fwen doxiu gonq, bouxhek hoizdap le cix hawj hek eu gonq, bouxcawj cix hoizdap. Bouxhek gangj cingcuj vihmaz daeuj, caiq ciuq gij ciengqfap cienzdoengj eu hwnjdaeuj. Gij diuhfwen cungj heuhguh “diuh Dahnamzbuenz”, youh faen miz diuhraez、diuhdinj, song cungj diuh neix gak mbouj doxdoengz. Diuh “deng lo deng lo na” dwg fwen lwnh saeh, aeu ma gangjgoj lai, dwg diuhraez; diuh “aeyo youx ae youx” cix dwg fwenyoux yienh’ok cingzgyaez haenx, dwg diuhdinj. Song mbiengj cungj gig yawjnaek diuhdinj. Gyoengqde doxhaenh gonq riengzlaeng doxdamq cingzeiq, couh lumj diuz mae’nding ndeu daj gyaeuj daengz rieng cungj yien gij gamjcingz songde hwnjdaeuj. Hawfwen yaek sat lo, hoeng diuhdinj doiqfwen vanzlij mbouj dingz mbouj duenh, cungj mbouj sij sat. Diuhraez caeuq diuhdinj doxgap doxriengz, seiz sang seiz daemq, hawj vunz simmaez.

　　Hawfwen Bouxcuengh Lungzlinz daj doenghbaez riuzcienz roengz- daeuj, de dwg gij coengmingz ciuhgeq raeuz, caemh dwg gij dijbauj raeuz wngdang mbouj dingz cienzciep roengzbae haenx. Moix bi liggaeuq sam nyied cosam, Bouxcuengh Lungzlinz cungj daenj gij buhvaq minzcuz haenx, sim’angq eu fwen bae hoh “sam nyied sam”. Yienh- ciengz vunz lai vunz daih, gyoengq hek caeuq baengzyoux doxcomz youq gizhaenx, ciengzmienh gig nauhyied. Geijlai bi gvaqdaeuj lo, gij gveihmoz hawfwen Bouxcuengh Lungzlinz neix yied fat yied hung, yied daeuj yied hoengh, daengz seizneix couh bienq- baenz gij vwnzva hozdung Gvangjsih、Yinznanz、Gveicouh sam aen sengj gak aen minzcuz doxcaeuq.

编辑：韦亦玮