Hoihmiuh Yahlungz Vaihsa Bwzhaij

来源：广西民族报

作者：Maj Veiyungz comz hoiz

发布时间：2020-06-22

Guh yizsi dwkcuengq baiq Yahlungz.

Aendoih caeqbaiq bae youz haw.

Doih youz haw byaij gvaq gai gaeuq.

Ndaw doih youz haw miz doxgaiq daegsaek lai.

Vunzlai siuyieng baiq Yahlungz.

Ndaw dengxva cang rim fukbaed.

Congzbaed ndaw Miuh Yahlunngz, siengqbaed Yahlungz naengh coij laeng baihswix boux daihsam.

Lungzva youz haw foux mbouj dingz.

Ciengzmienh ciep “mougim” hung hoenghhwd.

Aendoih youz haw raezrangrang.

　　“Hoihmiuh Yahlungz Vaihsa”（youh heuh “caeqbaiq haij Vaihsa”）dwg Vunzdan Bwzhaij cungj biujyienh hingzsik baiqfug Yahlungz ndeu. Youq moix bi liggaeuq ndwencieng cibngux guh bingzan、ndwencieng cibloeg mbaenjfuk、ndwenngux cibbet hoh ngoenzseng Yahlungz、ndwenlab cibloeg hawjfuk daengj ciet baelaeng Miuh Yahlungz mbaenjfuk hoiznyienh dwg vunz Vaihsa Bwzhaij cungj fungsug cienzdoengj ndeu. Muzdiz dwg docih Yahlungz caeuq gyoengq sien daengx bi cungj baujyouh gyoengqde cang rim maranz、ndwenngoenz vuenyungz, caemhcaiq mbaenj- gouz saedceij yied daeuj yied hoenghvuengh.

　　Riuznaeuz, miz bouxdwkbya ndeu bae haij feuh Vaihsa Bwzhaij dwkbya, gip ndaej duz byaleix dai ndeu, de couh dawz duz de maranz, yaek cek de guh byaek gwn. Hoeng de dawz cax yaek gvet gyaepbya seiz, duz byaleix neix sawqmwh diuq hwnjdaeuj. Seizneix miz boux sien ndeu okyienh youq baihnaj de, naeuz：“Duz byaleix neix dwg Yahlungz bienqbaenz, vaiq cuengq duz de bae, comz vunzlai youq gizneix coih aen miuh ndeu daeuj dwkcuengq Yahlungz, Yahlungz ndaej baujyouh sou okhaij dwkbya bingzan. Bouxdwkbya neix dingq le, couh dauq cuengq duz byaleix roengz haij bae lo. Doeklaeng, gyoengqvunz Vaihsa couh comz ngaenz guh le Miuh Yahlungz, dwkcuengq siengqyou Yahlungz, it bi seiqgeiq yieng lab cungj mbouj dingz mbouj duenh.

　　Daj seizde gvaqdaeuj, dang- dieg daj liggaeuq ndwenlab cibloeg daengz cibbet dwg ngoenz hawjfuk, dwg baenz bi daeuj aen hozdung siuyieng ceiq youqgaenj haenx. Ngoenz gonq, boux guenj yieng lab ndaw miuh haenx couh ra vunzlai daeuj, aeu gij ngaenz comz daeuj haenx dingh’aeu mouseng le, cix gyau hawj cangh cienmonz guh “mougim” haenx bae loengh. Binaengz hoihmiuh, mougim lai cix miz bak duz noix cungj miz hajcib duz. Deq hozdung sat le, couh dawz gij mougim faen hawj gij ranz roxnaeuz boux caeuqfaenh comz- ngaenz haenx, hawj gyoengqde daiq baema baiq cojgoeng. Ngoenz cibloeg gyanghaet, baenz bak boux vunz Vaihsa ndang daenj buhvaq Vunzdan cienzdoengj daeuj banh gij hozdung ram sien youz haw. Sing gyonglaz、sing loxlez goksadsad yiengj hwnj- daeuj, aen duivuj neix daj Miuh Yahlungz hwnjdin bae ciep mougim, eu fwen diuqfoux baenz roen, angqangq yangzyangz. Gyoengqde yaengx fukvang caeuq gak saek geizfan、ram duzyou Yahlungz、gang liengjva、nyoengx dengxva、loengh saeceij、roq gyonghwet、niuj yanghgoh、eu fwen Vunzdan. Bak geij duz mougim henjrwgrwg haenx yungh cisamloek caeuq dengxva cang ndei le, aen doih neix caiq byaij gvaq hongh hawgaeuq Bwzhaij, dauqma daengz Miuh Yahlungz. Gij hozdung biujyienj eu fwen diuqfoux vuenheij haenx, ciuyinx haujlai bouxyawj daengzdin roengzdaeuj humxyawj.

　　Bi 2010, hoihmiuh Yahlungz Vaihsa ndaej senj haeuj buek daihsam swcigih gaep feihvuzciz vwnzva yizcanj mingzloeg.

编辑：