Daemjman Bouxcuengh Lungzcouh

来源：广西民族报

作者：Sinhyungz comz hoiz

发布时间：2020-06-11

Mehmbwk Veiz Suyingh baij gij man de daemj baenz haenx.

Vunz guekrog caemh bae ndaw mbanj yawjngonz daemj man.

Gyoengq saulengj ndaw mbanj comz daemj man.

Mbanjciz baenz dieggoek dinfwngz daemj man.

Mehmbwk Mbanjciz bouxboux rox daemj man.

Daxmeh son dahniq daemj man, dinfwngz daihdaih cienz roengzbae.

Gyoengq mehmbwk nyaengq rag maedaengj.

Mehmbwk dawz maedaengj maevang cang hwnj gwnz aen- daemjrok.

Naihlaux naengh baihhenz yawj daemj man.

　　Dahcojgyangh ngutngut ngaeungaeu raemx laeyaengyaeng, gig rox dajcauh dwk ngutngaeu mbat hung ndeu, ungganq baenz yienhsingz Lungzcouh gyaeundei dwggyaez neix. Gizneix miz cungj dinfwngz fwngzguh swnjcienz baenz song cien lai bi ndeu, de sengdoengh dwk baijyienj gangjlwnh le gij gyaeundei aen minzcuz ndeu, hawj vunz dawz de dangguh gij hauhbiu vwnzva aen minzcuz neix, gijneix couhdwg ——Mancuengh Ginhlungz.

　　Mancuengh Ginhlungz dwg guek raeuz seiq cungj manz mizmingz ndawde cungj ndeu, dwg gaiqbauj vwnzva minzcuz Guengjsae. Ginhlungz daj Ciuz- han ndujdaeuz couh miz gij sibgvenq ndaem gosangh ciengx nonsei, aeu seireh daemj man, aeu man guh najdenz dangguh doxgaiq baehaq haenx. Man- cuengh Ginhlungz dwg aeu aen “Gihhuz” faexdoq yungh fwngz daemj baenz. “Gihhuz” dwg youz gyaqdaemjrok、cangmae、riuj- mae、riujva caeuq dwkva haj gaiq gyoebbaenz. Daemj man seiz aeu maedaengj maevang doxgyau daemj. Maedaengj aeu maedaej Mancuengh, faen maedaengjboux maedaengjmeh song caengz, gij saek de baenzbaenz dwg saek- haurongh seireh mbouj bienq. Ciuq yotsei - dozmae - “bin- loz” - yien maedaengj - con bakngaz - cang rokva - faen maeboux maemeh - cang gih- huz - daemj man daengj gonq- laeng bae daemjrok. Maevang gietdingh daemj baenz manva yienghlawz, bingzciengz aeu gij mae’ndaij roxnaeuz maelwenq nyumx baenz lai cungj saek mbouj laenz gvaq roxnaeuz loq laenz di guh mae, gij saek de ciuq mbawdoz yiengh bienq de mboujduenh bienqvuenh. Daemj man seiz, ciuq gij doz veh ndei haenx, aeu diuzcik vadauz saek- seuj raizva okdaeuj, lumjbaenz yiengh doz dwg saekhoengz, couh ciep maehoengz hwnjbae; yiengh doz dwg saek heu, couh raed maehoengz goenq bae, ciep maeheu hwnjbae. Yienghneix mboujduenh bae “ciep daengj gat vang”, hawj sienq daengj sienq vang mboujduenh doxgyau, couh ndaej daemj baenz fuk Mancuengh gij saek mbouj doxdoengz, gij va cix gak yiengh, gyaeundei dangqmaz ndeu.

　　Mancuengh Ginhlungz youq lizsij gwnzde ndaej lied guh laexsoengq dijbauj ciuzdingz gak ciuz gvaq. Gaijfang gvaqdaeuj, Mancuengh Ginhlungz ndaej swnjcienz caeuq hwngfat ndaej ndei, camgya daengx gih daengx guek gunghyi meijsuzbinj minz- cuz vunznoix doxdax roxnaeuz baijyawj haujlai baez gvaq. Bi 1976 ndwen 9, Ginhlungz Cin Gveibingz Cunh Mbanjien “bet cejnuengx singq Max” haenx vih biujdap faenhsim niemhngeix Mauz Cwzdungh cujsiz, yungh 28 aen hwnzngoenz daemj baenz le fuk Mancuengh baihndaw sieng mbawsiengq Mauz cujsiz, baihlaj mbawsiengq seujsiuq miz cihsaw “Mauz cujsiz ciengxlwenx youq ndawsim raeuz”, soengq daengz Gvangjsih Bozvuzgvanj baijyawj, ndaw guek rog guek rox caez bae. Gaijgwz hailangh le, Mancuengh Ginhlungz gai bae daengz daengx guek gak dieg caiqlij Sinh- gyahboh、Yizbwnj、Meijgoz、Gyahnazda daengj guekgya rog guek dem. Bi 2018 ndwen 12, dinfwngz daemjman Bouxcuengh Ginhlungz Lungzcouh ndaej lied haeuj buek daihcaet swcigih gaep feihvuzciz vwnzva yizcanj daiqbiuqsingq hangh- moeg mingzloeg.

编辑：韦亦玮

Dinfwngz Fwngzguh Swnjcienz Baenz Cien Bi——