Daeng’va’mbu Bouxcuengh - 广西民族报网

Daeng’va’mbu Bouxcuengh

来源：广西民族报

作者：Godoq comz hoiz

发布时间：2020-05-07

Canghyienjheiq son bouxcoz yienj foux daeng’va’mbu.

Gyoengq dauh baijyienj daeng’va’mbu.

Bouxdauh cangyiengh bwh yienj.

Gyoengq bouxyienj cingq yienj yiengh“va’mbu”.

Foux va’mbu youq gwnz daizheiq yienj hix ndeiyawj dangqmaz.

Bouxswnjcienz cingq yienj foux daeng’va’mbu.

Vunz dangdieg haenqrengz lienh《Foux Daeng’va’mbu》.

Vunzlai caez yienj ciengzmienh ndeiyawj.

　　Daeng’va’mbu Bouxcuengh hix heuhguh foux va’mbu fwngzbaed, dwg cungj foux ndawbiengz Bouxcuengh ndeu, giz hwnghoengh daeuz dwg Lungzanh Yen Yen’gyangh Cin, caemhcaiq lij youq Lungzanh Yen Cwngzsiengh Cin、Nazdung Cin、Gyauzgen Cin、Nanzhih Cin vanzlij Bwzswz、Bingzgoj daengj dieg riuzcienz, miz 200 lai bi nanz lo.

　　Daeng’va’mbu Bouxcuengh dwg bouxdauh(goengsae) youq hai ranzcai seiz vihliux hairoen duzhoenz couh diuq duenh foux miz daegsaek dangqmaz ndeu. Youq dangdieg, doenghboux vunzgeq miz lwg miz mbwk、lwg lan rim ranz、miz caez gvaq ndei haenx dai roxnaeuz cangqmoh ne, vunz dangdieg cungj guh hozdung dajcaeq. Heijdaeuz guh hozdung gaxgonq an aen daiz bouxsae ndeu coq baihnaj baizhoenz bouxgvaqseiq, vanq caengz haeuxsan ndeu coq gwnz daiz, nda 9 aen vanj iq coq, henz vanj nem 9 limq va aeu ceij henj、hoengz、heu raed baenz haenx, yiengh lumj va’mbu gyaeu- ndei. Ndaw vanj coq miz youz- duznamh roxnaeuz youzgyaeuq, coq geu daengcauj(roxnaeuz labcuk) diemj dawz, baiz baenz sam hangz gungh 9 aen daeng’va.

　　Dajcaeq gingciengz aeu 7 daengz 9 bouxdauh(goengsae), gyoengq bouxdauh daenj ndangdaenj gyaeundei, bouxdaeuz ndang daenj buhdauh raez、gyaeuj daenj mauh- baed、hoz venj cawbaed. Gyoengqde youq baihnaj daizsae ngon ging gonq, doq ciengq doq daj ndaw fwngz gyoengq lwgsai hauq ciep yieng gvaqdaeuj baek coq gwnz daizsae, liuxle roq gyong roq laz baez dem baez, yienghneix guh soh daengz hwnj yieng liux.

　　Gvaqlaeng, bouxdauh(goengsae) hainduj diuq “foux daeng’va’mbu”, gyoengqde fwngz gaem laz iq daengj doxgaiq, humx “daeng’va’mbu” gonqlaeng baiz baenz coij, gyoengq dauh roq gyong roq laz, bouxdauh daeuz youq ndawgyang vunzlai cienq bae cienq dauq, mboujduenh bienq yiengh ndang. Caemhcaiq yungh fwngz、gen、lwgfwngz fan cienq mbouj daengx, bienq ok haujlai cungj yiengh foux……gyoengq dauh diuqfoux de diuq duenh ndeu liux, couh daengz duenh 6 aen foux fwngzva doq ciengq doq diuq haenx, caemh dwg youz bouxdauh ciengq caeuq diuq, gyoengq bouxdauq riengz sing caez ciengq, roq doenghyiengh guhbuenx. Ceiqlaeng, gyoengq dauh diuqfoux haenx youh diuq gij foux “genva fwngzbaed” bienqvaq lailai haenx, daihgaiq buenq aen cung, “foux daeng’va- mbu” diuq sat lo.

　　Gij daeng’va youz ban dauh ndawde boux rox dinfwngz haenx guh, yiengh ndeiyawj, diemj rongh seiz ronghliklik bae, lwenqda dangqmaz.

　　Ginggvaq bienqvaq, “foux daeng’va’mbu” seizneix mboujdan lij youq ndawbiengz riuzcienz, hix baenz le gij foux ndawbiengz Bouxcuengh miz daegsaek lailai ndaej hwnj daizheiq yienj haenx. 20 sigij 80 nienzdaih duenh satlaeng,《Foux Va’mbu Fwngzbaed》caemgya Nanzningz Digih vwnzyi comzyienj, dangseiz couh ndaej vunzlai haenh- ndei, doxdax ndaej it daengj ciengj. Bi 1990, Lungzanh Yen Vwnzva- gvanj doi《Foux Va’mbu Fwngzbaed》camgya Nanzningz Digih foux ndaw- biengz doxdax, ndaej gij hanghmoeg cauh foux、yienj foux sam daengj ciengj.

　　Ginggvaq geijcib bi lai baez gaij bien,《Foux Va’mbu Fwngzbaed》youz gaxgonq bouxdog yienj bienq- baenz vunzlai yienj, youz gaxgonq bouxmbwk yienj bienq daengz seizneix sai mbwk caemh yienj. Bi 2011, Lungzanh Yen Sinhhingh Segih gaij bien《Foux Va’mbu Fwngzbaed》le yienj hwnj daizheiq hung, caemhcaiq gaij mingzcoh baenz《Daeng’va’mbu Fwngzbaed》, baez foux youz 16 bouxyienj diuq haenx, dwg baez “fouxva’mbu” ceiq hung ndeu. “Daeng’va’mbu” cungj yisuz ndawbiengz gaeuqgeq neix, ginggvaq gaijbien gyagoeng le, caiqlij fat rongh engq lwenqda.

编辑：韦亦玮