Bouxcoz Nyezrauh Gvangjsih Cungzging Song Dieg Yien Fwngz Caez Guh Minzcuz Doxgiet Yenzhag

来源：广西民族报网

作者：□Loz Denh/罗添 Cangh Sinhyiz/张新怡 Liuz Dingzveih/刘廷辉

发布时间：2026-08-18

▲Bouxcoz nyezrauh caemh diuq fouxfaexsaux.

▲Bouxcoz nyezrauh cazyawj lingzgyaeujhau.

▲Bouxcoz nyezrauh daejniemh danz aendingzdingj.

Gaenh geij ngoenz neix, gak cuz bouxcoz nyezrauh Gvangjsih Cungzging gyauliuz hozdung youq Gvangjsih haiguh, hozdung youz Gvangjsih Minzcunghveij caeuq Gungcinghdonz Cungzging Siveij、Cungzging Si Minzcunghveij、Cungzging Si Gyauveij lienzhab gawjbanh. Bak lai boux bouxcoz nyezrauh Cungzging hamj gvaq cien leix, caeuq bouxcoz nyezrauh Gvangjsih yien fwngz doxcomz, cienzmienh guh “sam gyau”, sengdoengh baijok gij yienghsiengq ndei bouxcoz nyezrauh Gvangjsih Cungzging song dieg doengzsim doxhwnj、doxgiet baenaj, laegdaeuq gejgangj le seizdaih neihanz “Cunghvaz Minzcuz ranz vunz ndeu, doengzsim caezhwnq aen loqsiengj Cungguek”.

Bouxcoz nyezrauh song dieg daengz Cungzcoj、Fangzcwngzgangj、Ginhcouh、Nanzningz daengj dieg, guh hozdung saekhoengz saedguh、feihyiz daejniemh、swyenz yenzhag daengj, bouxcoz nyezrauh song dieg dingq gij goj dawz gyaiq hoh gyaiq, roxnyinh bak bi lizsij henzgyaiq、roxyiuj yiyi hungloet guekranz conq namh mbouj nyiengh, mboujduenh demgiengz “haj aen nyinhdoengz”, giendingh simnduj bauqguek; yawj gij ndangdaenj minzcuz miz daegsaek、daejniemh aendingzdingj feihyiz、caenfwngz danz ginzyienzdog Ginghcuz daengj lai cungj vwnzva daejniemh, hawj bouxcoz nyezrauh song dieg youq ndaw vwnzva baedauq dwkbyoengq gaeglaeg、rag aensim doxgyawj; bouxcoz nyezrauh song dieg bae cunz Raemxdiuqdat Dwzdenh、Mingzsw Denzyenz, damqra giz diegyouq lingzgyaeujhau, youq Byacinghsiusanh hag gij swnghdai cihsiz doenghgo yayezdai, byaij youq ndaw swyenz, gyoengq bouxcoz nyezrauh yawj engq gvangq、rox engq lai.

Baez hozdung neix dwg gij saedguh sengdoengh Gvangjsih Cungzging song dieg baengh doeng sae doxgap canloz、lai bouhmonz lienzdoengh doicaenh gak minzcuz bouxcoz nyezrauh gyauhliuz giva. Hozdung yungzhab gyaez guek souj henz gyauyuz、minzcuz vwnzva cienzciep、swyenz gohbuj saedguh, mizyauq dap le aen bingzdaiz hamj gizdieg bouxcoz nyezrauh gyauhliuz, doidoengh le gak minzcuz bouxcoz nyezrauh “sam gyau”, mboujduenh couqmaenh gij eiqsik Cunghvaz Minzcuz ranz vunz ndeu, hawj dujva minzcuz doxgiet baenaj youq ndaw sim bouxcoz nyezrauh Gvangjsih Cungzging song dieg hailangh hoenghhwd.

编辑：实习生石喜丹复审：黄慧华终审：蒙树起