Gvangjsih 3 Bouh Cozbinj Ndaej Gaiq Cibsam Daengx Guek Siujsoq Minzcuz Vwnzyoz Cauhguh Cinmajciengj

来源：广西民族报

发布时间：2024-08-07

　　7 nyied 31 hauh, Gaiq Cibsam Daengx Guek Siujsoq Minzcuz Vwnz- yoz Cauhguh Cinmajciengj bingzsenj gezgoj goengbouh hawj vunzlai rox, gungh bingz ok 25 bouh ndaej ciengj cozbinj caeuq 5 vunz bouxhoiz ndaej ciengj. Gvangjsih miz 3 bouh cozbinj ndaej ciengj, soq ndaej ciengj youq daengx guek gak swngj(gih、si) baihnaj.

　　Gvangjsih 3 bouh cozbinj ndaej ciengj faenbied dwg：Sawcuenh bienraez《Fwnhoenz Dumh Lizgyangh》（bouxraiz Gvangh Banz, Yauzcuz）, sawcuenh bienrauh dinj《Bouxyoux Sanglingj》（bouxraiz Fanz Yizbingz, Bouxcuengh）, sei《Doek Roengzdaeuj》（bouxraiz Vangz Fangh, Boux- cuengh）. Cozbinj mizmbangj raiz gij gojgaeq gingjsaek Lizgyangh gyaeu- ndei caeuq vunz nem swhyienz huzndei caemhyouq henz Lizgyangh, mizmbangj raiz gij ndwenngoenz lauxsaed caemhcaiq giendingh boux vunz bingzciengz mbanjbya baihsae Gvangjsih, mizmbangj raiz gij bya dah nywj faex caeuq fungcingz Gvangjsih、lwnh gij cingzgyaez caeuq maqmuengh daengj, cungfaen yienh- ok gij gizmen ndei geij bi neix Gvangjsih siujsoq minzcuz vwnzyoz daezcaiz funggek lai yiengh, fanjwngq le gij yiengh cauhguh ndei seizneix Gvangjsih siujsoq minzcuz vwnzyoz cauhguh haeujlaeg ndwenngoenz、depgyawj bouxminz、gaenndaet seiz- daih.

　　Daengx Guek Siujsoq Minzcuz Vwnzyoz Cauhguh Cinmajciengj dwg guekgya gaep vwnzyozciengj youz Cunghgoz Cozgyah Hezvei、Guekgya Minzcuz Swvu Veijyenzvei caezcaemh cawjbanh, 1981 nienz laebbaenz, caeuq Mauz Dun Vwnzyozciengj、Luj Sin Vwnzyozciengj caeuq Lwgnyez Vwnzyozciengj Maenhndei Daengx Guek caemh heuhguh Cungguek vwnzyoz “seiq aen ciengj hung”. Gaiq cinmajciengj neix gungh miz 381 gienh cozbinj caeuq 11 vunz bouxhoiz cambingz, Gvangjsih gungh miz 32 bouh cozbinj cambingz.

　　Ciuq cam rox, suenq daengz gaiq cinmajciengj neix, Gvangjsih gungh miz 55 bouh cozbinj ndaej aen ciengj neix gvaq, yienh’ok Gvangjsih siujsoq minzcuz vwnzyoz cauhguh hwngfat hoenghhwdhwd.

　　(daj 《Gvangjsih Yiz Bau》 aeu daeuj genj hoiz Linz Seznaz)

编辑：黄誉琦复审：黄慧华终审：蒙树起