Gaiq Daih Cibroek Gih Yindungvei Yaek Youq 12 Nyied 1 Hauh Haimuq

来源：广西民族报网

发布时间：2026-09-04

8 nyied 27 hauh, gicej daj aen hoih fatbouh saehmoq Swcigih Cwng- fuj Sinhvwnz Ban ciuhai haenx ndaej rox, Gvangjsih Gaiq Daih Cibroek Yindungvei (baihlaj heuhguh “Gaiq Daih Cibroek Gihyinvei) giva youq 12 nyied 1 hauh guh haimuqsik, 12 nyied 13 hauh guh bixmuqsik, cawjciengz doxdax laeb youq Bwzhaij Si.

Gaiq Daih Cibroek Gihyinvei youz Swcigih Yinzminz Cwngfuj cawjbanh, Swcigih Dijyuzgiz、Bwzhaij Si Yinzminz Cwngfuj doengzcaez ciepbanh. Gaiq gihyinvei neix laeb hangh mauhgvaq gaiq gonq, ginggi dijyuz doxdax laeb 34 aen hanghmoeg、852 aen hangh iq, ginzcung doxdax laeb 21 aen hanghmoeg、157 aen hangh iq, boux camgya doxdax gveihmoz iekliengh yaek mauhgvaq 2 fanh vunz.

Doxdax bineix 8 nyied daengz 12 nyied guh, seizneix duenh daih’it doxdax gaenq haiguh. Haimuqsik gaxgonq, doxdax yaek laebdaeb guh liux 25 aen hanghmoeg ginggi dijyuz doxdax、17 aen hanghmoeg ginzcung doxdax, gizyawz hanghmoeg yaek youq bixmuqsik geizgan guh.

Cawz le 3 aen hanghmoeg ginggi dijyuz doxdax youq Nanzningz Si guh, gizyawz 31 aen hanghmoeg caeuq cienzbouh ginzcung doxdax cungj youq Bwzhaij Si guh. Baezneix cauhmoq gij vunqsik guh doxdax, dieg doxdax laeb youq hagdangz、segih、dieg gaicawx、dieg baeyouz、haijdauj daengj dieg, hawj doxdax byaij ok cangzgvanj, yungz haeuj gyanghoeng gunghgung hawsingz, cungfaen gikfat rengzndumj siuhfei “dijyuz +”.

Seizneix, Swcigih Dijyuzgiz caeuq Bwzhaij Si gaenq doengzcaez laebbaenz aen veijyenzvei couzbei doxdax, onjyamq doinyoengx hong cujciz doxdax、fungheiq doxdax、 gveigawj doxdax、cangzgvanj hwnqguh daengj, roengzrengz dajcauh aen hoihhoengh dijyuz miz rengz yingj- yangj daengx guek、 gij daegsaek Gvangjsih、 gij funghcingz Bwzhaij haenx.

Linghvaih, Gvangjsih Gaiq Daih Cib’it Bouxcanz Yindungvei Caeuq Gaiq Daihroek Daegbied Aulinzbizgwz Yindungvei hix yaek caeuq Gaiq Daih Cibroek Gih Yindungvei doengzgeiz guh. (Cinz Liuzliuz)

编辑：实习生廖小凤复审：黄慧华终审：蒙树起