Veiz Dauh: Dawzmaenh Laebdaeb Haenqrengz Doicaenh Hwnqguh Aen Gih Guhyiengh Couqmaenh Gij Eiqsik Cunghvaz Minzcuz Ranz Vunz Ndeu

来源：广西民族报网

发布时间：2026-08-26

8 nyied 18 hauh, Swcigih cujsiz Veiz Dauh daengz Gvangjsih Minzcuz Dayoz、aen segih yiengh doxsaeb、Swcigih Minzcunghveij diuyenz hong minzcuz doxgiet baenaj, daegbied gangj daengz aeu haeujlaeg doekguh gij swhsiengj youqgaenj gyaak caeuq gaijndei hong minzcuz caeuq gij iugouz youqgaenj lwnhgangj hong Gvangjsih Siz Ginbingz cungjsuhgi gangj haenx, gaenjndaet hopheux couqmaenh gij eiqsik Cunghvaz Minz- cuz ranz vunz ndeu diuz sienqmeh neix, dawzmaenh laebdaeb haenq- rengz, netsaed doicaenh hwnqguh aen gih guhyiengh couqmaenh gij eiqsik Cunghvaz Minzcuz ranz vunz ndeu, haenqrengz haicauh aen buenz moq gij saehnieb minzcuz doxgiet baenaj.

Gvangjsih Minzcuz Dayoz Cunghvaz Minzcuz Gungdungzdij Yisiz Yenzgiuyen laebdaeb sam lwnz senjhaeuj guekgya seiq buveij aen gihdi yenzgiu gij eiqsik Cunghvaz Minzcuz ranz vunz ndeu, geij bi neix daeuj rapdawz caemhcaiq guhsat lai hangh hong bienraiz mizgven hanghmoeg yenzgiu hungnaek. Veiz Dauh daeuj daengz yenzgiuyen、vahgangj bozvuzgvanj、Dunghmungz vwnzva gyauhliuz cunghsinh, ciengzsaeq roxyiuj gij lijlun yenzgiu Cunghvaz Minzcuz ranz vunz ndeu、vahgangj yenzgiu caeuq baujhoh、doiqrog vwnzva doxgyau daengj cingzgvang. De vixok, vwnzva nyinhdoengz dwg gij nyinhdoengz ceiq laeg, maqmuengh Gvangjsih Minzcuz Dayoz lailai doicaenh Cunghvaz Minz- cuz gungdungzdijyoz gyauca yozgoh gensez, lai bae gihcwngz diuyenz, ceng’aeu doiok engqlai yenzgiu cwngzgoj, hawj deihfueng mizgven hong laebfap ndaej camgauj gezcwz, bangrengz Gvangjsih hwnqguh aen gih guhyiengh couqmaenh gij eiqsik Cunghvaz Minzcuz ranz vunz ndeu.

Nanzningz Si Gyanghnanz Gih Nazhungz Gaihdau Beihungz Segih vunz ciengzyouq 1.58 fanh boux, miz vunz Bouxcuengh、Bouxgun、Yauzcuz、Myauzcuz daengj 19 aen minzcuz, dwg aen segih yiengh doxsaeb lai minzcuz denjhingz. Veiz Dauh byaij haeuj segih dangjginz fuzvu cunghsinh, nyinhcaen dingq segih gihbwnj cingzgvang gaisau, caeuq gihminz ginzcung gangjgoj, roxyiuj segih doinyoengx hong gak minzcuz doxbyaij doxgyau doxyungz daengj. Veiz Dauh daegbied gangj daengz, segih dwg aen dieg youqgaenj cauhlaeb minzcuz doxgiet baenaj, aeu dawzmaenh dangjgen dazyinx, lai ra loh moq ceihleix gihcwngz, lai bang gihminz guh saehndei、guh saehsaed、gaijgez saehhoj, mboujduenh guhndei hwnjmbaek sevei gezgou caeuq segih vanzging yiengh doxsaeb, coicaenh gak cuz ginzcung caezyouq caezhag、caezhwnq caezyungh、caezguh caezangq.

Youq Swcigih Minzcunghveij, Veiz Dauh yawjngonz aen ding langhbaij saw vah caeuq sawgeq saujsu minzcuz Gvangjsih、aen ding langhbaij hong minzcuz cunghgyau Gvangjsih, roxyiuj hong minzcuz daengx gih daengj cingzgvang. Veiz Dauh vixok, Gvangjsih dwg dieg minzcuz henzguek, Swcigih Minzcunghveij aeu haeujlaeg hagsib senhconz gvancez ndei aen fap coicaenh minzcuz doxgiet baenaj, cauhmoq yiengh bujfaz, hawj fapceih senhconz gyauyuz haeuj ndok haeuj ngviz; gyavaiq dinghguh gij fapgvi deihfueng coicaenh minzcuz doxgiet baenaj, giethab Gvangjsih saedsaeh netsaed doicaenh hwnqguh “haj aen suenranz”, mizhingz mizgamj mizyauq couqmaenh gij eiqsik Cunghvaz Minzcuz ranz vunz ndeu, gyaak gih raeuz minzcuz vwnzva baujhoh、cienzswnj caeuq hwngfat, haeujlaeg yenzgiu gij neihanz seizdaih caeuq gyaciz yienhsaed minzcuz vwnzva; haenqrengz haeujcoengh swciyen hwngfat, guhhung gij rengz ginghci aen yienh, laebndei giekdaej sezsih caeuq gunghgung fuzvu, doinyoengx gak minzcuz caezcaemh mwnhoengh hwngfat, laebdaeb ca ndei hong cunghgyau, baenzroix doicaenh gij saedguh Gvangjsih cunghgyau bienq hab Cungguek raeuz.

(daj 《Gvangjsih Yizbau》 aeu daeuj hoiz Cungh Siujgij)

编辑：实习生石喜丹复审：黄慧华终审：蒙树起