Dahyinh Bingzluz Baez Nduj Guh Ruz Dansienq Suengyiengq Gvaqcab Sawqniemh

来源：广西民族报网

发布时间：2026-08-24

8 nyied 13 hauh, youq Dahyinh Bingzluz Gisiz Suhniuj, baez nduj guh ruz dansienq suengyiengq gvaqcab sawqniemh. Sawqniemh hopheux ruz cang naek 5000 dunh gaep caeuq 3000 dunh gaep gonqlaeng guhsat doxroengz、doxhwnj gvaqcab bouhloh, cungdenj haeujrwz gij vwndiz raemxlae nyauxdoengh fazmwnz guh dwkraemx vaiqmenh yinxfat haenx, vih suhniuj ancienz doengloh rox cingcuj giekdaej.

Gisiz Suhniuj yungh gij cabruz mbaet raemx doxdaeb sam gaep seiqgyaiq cauhnduj haenx, fazmwnz hai gven vaiqmenh daengz “haidou faen cung ndeu、gvendou 30 miux”, mauhgvaq aen biucinj seiz hai gven bingzciengz 3 daengz 4 faencung. Cimdoiq gak loih fungyiemj caeuq nanzdiemj, aen doih hwnqguh guenjleix Dahyinh Bingzluz yawjgaenj doengauqruz donhgwnz donhlaj、diegraemx haedsim funghcab song aen gizdieg youqgaenj, daj lai gakdoh doxbeij gak loih cag haed caeuq ruz lamh dingz fuengsik, fanfuk guh、cug hangh doiqbeij、genj ndei leh, caemhcaiq youq cag ruz、dongh lamh ciengzcab gyacang aen conzganjgi rengzrag cingsaeq, seizseiz aeu gij soq cag deng raemxlae cungdongj geijlai, laebdaeb geiqloeg aenruz senj vang、biu raeh、ruz ngengq, haeujgyawj yawj ndaw cab raemxlae baenzlawz、vanlouh youq lawz、 raemx hwnjroengz bienqvaq, bak lai hangh soqgawq seizseiz cienz dauq, moix cuj soq cungj vih ruz cang naek gvaqcab ancienz bingzguj daezhawj ciuqei maenhsaed.

“Cingqsik haidoeng gaxgonq, aeu cienzmienh genjniemh miz gak cungj cingzgvang ruz gvaqcab ancienz, dingh de dwg mbouj dwg hab gveihfan caeuq dajveh iugouz, caemhcaiq ciuq cabruz baizraemx gocwngz funghcab caeuq roenyinxhangz raemxlae diuzgienh、hwnjroengz、ruz deng rengz caeuq senj dieg daengj cingzgvang guh’ok gyonjgyaeb buenqduenh.” Cunghgoz Gunghcwngzyen yensw、Nanzgingh Suijli Gohyoz Yenzgiuyen nyuenz cungjgunghcwngzswh Huz Yaanh mwh youq yienhciengz dazyinx gaisau.

Ciuq sawqniemh iugouz, aenruz sawqniemh yaek lai baez haeujok Gisiz Suhniuj cabruz mbiengjgvaz, youq ndaw rog cabruz dingz youq mbouj doengz diegdingz, guh soqgawq doiqbeij. Sawqniemh sat le, Gisiz Suhniuj ruz cang naek soqgawq saedcaek yaek gvihaeuj 《Gij Baugau Ruz Habhangz Sawqniemh》, gyonj cingjleix dingzgauq fueng’anq、ruz cang naek gvaqcab gaemguenj sicwz caeuq yinhhengz diuhdoh biucinj, gaengawq gij cingzgvang saedsaeh doenghangz, doiq soq dajveh guh fukhaed caeuq haeddoiq, vih 9 nyied ciuqseiz hwnq baenz haidoeng dwk roengz giekdaej maenhsaed.

(daj 《Gvangjsih Yizbau》 aeu daeuj hoiz Vangz Yenjlaiz Liz Yinh)

编辑：实习生廖小凤复审：黄慧华终审：蒙树起