Byongh Bi Gonq Gvangjsih Soq Yezvu Vaiqsoengq Doengzbeij Lai Hwnj Mauhgvaq Sam Cingz

来源：广西民族报网

发布时间：2026-08-20

Mboengqneix, gicej daj Gvangjsih Youzcwng Gvanjlijgiz roxyiuj, bineix byongh bi gonq, daengx gih soq yezvu vaiqsoengq guhsat 14.83 ik gienh, doengzbeij lai hwnj 31.7%, ndawde, Vuzcouh、Liujcouh、Hozciz、Yilinz 4 aen si laeb gih soq yezvu vaiqsoengq demvaiq mauhgvaq 50%. Daengx gih soq douzsoengq vaiqsoengq guhsat 24.26 ik gienh, doengzbeij lai hwnj 8.33%, sou douz song mbiengj cungj baujciz lai hwnj haemq vaiq.

Bineix byongh bi gonq, daengx gih soq yezvu vaiqsoengq demvaiq sang gvaq soq douzsoengq lailai, douzsoengq beijlaeh youz bi’gvaq caemhseiz 1∶1.99 daengz seizneix 1∶1.64, naeuz ok Gvangjsih “cawx haeujdaeuj” lai haenq doengzseiz, doxgaiq “gai okbae” yied daeuj yied lai, doxgaiq ndei Gvangjsih youq aen hawciengz hung daengx guek lai vuengh.

Gih raeuz mboujduenh guhlaeg hwnqguh aen dijhi vuzliuz geiqsoengq lajmbanj, yienh yangh cunh sam gaep muengx vuzliuz geiqsoengq ngoenz caezcienz gvaq ngoenz. Bineix byongh bi gonq soq yezvu vaiqsoengq dieg lajmbanj gih raeuz doengzbeij lai hwnj 12.56%, doenggvaq aen vunqsik “vaiqsoengq+densangh” fat ok doxgaiq reihnaz vaiqgienh 1.36 ik gienh, ragdoengh canjciz ca mbouj lai 54 ik maenz. Makgaemjgaet Yungzanh、Makgamvozganh Vujmingz、makgai Bwzswz daengj 9 aen hanghmoeg ndaej bingz aen hanghmoeg guhyiengh vaiqsoengq fugsaeh nungzyez daihneix gaep guekgya, ndangdaenj、doxgaiq ceij guh、faenjsae、gyadienh iq daengj soq vaiqgienh doxgaiq gunghyez mbaeu miz daegsaek Gvangjsih mauhgvaq 2.81 ik gienh.

Seizneix, gih raeuz buek hanghmoeg daihhingz vaiqsoengq suhniuj cingq gyagaenj hwnqguh, haujlai aen cunghsinh faenleh giyez vaiqsoengq guh gaijcauh bienq gvairaeh, hawj ceiqleix vaiqgienh lai vaiq, hangzyez gansienq ngoenz cawqleix cunggvaq 4000 fanh gienh, doengzbeij daezswng 14.3%, hangzyez vaiqsoengq hwngfat rengznyoengx lai ak, hangzyez laebdaeb doihaeuj ciengzgingj geiqsoengq gvai doek dieg yungh, gyavaiq mbouj yungh vunz boiqsoengq、gij sezsih diegbyai gvairaeh cienzdoh doigvangq, daengz seizneix, Vuzcouh、Laizbinh、Hocouh caeuq Nanzningz Liengzging Gih、Cungzcoj Bingzsiengz Si daengj lai dieg sawqdiemj yungh ci mbouj yungh vunz vaiqsoengq mauhgvaq 100 aen, daengx gih douzhaeuj sieng vaiqsoengq gvairaeh guh baenz gek mauhgvaq 89 fanh aen, diegbyai boiqsoengq bienq gvairaeh、hawj minz fuengbienh laebdaeb daezswng.

（Goz Yagingz Lij Gencungh）

编辑：实习生廖小凤复审：黄慧华终审：蒙树起