Canghvuz Yen Doinyoengx Cazloegbauj Daengx Diuz Lienh Canjyez Hwnjmbaek Lai Ndei

来源：广西民族报网

发布时间：2026-08-20

Mboengqneix, youq Canghvuz Yen dieg ndaem cazloegbauj, vangjdoxlienz gamcaek sezbei seizseiz aeu gij soqgawq suencaz dohraeuj dohmbaeq、nditrongh、fwndoek geijlai daengj, aen cwngzsi “Caz Goek Cazloegbauj” hawj mbawcaz daj ndaem、gyagoeng daengz yocang、gai guhbaenz saujmax ndaej ra goek. Riengz 《Aen Diuzlaeh Hwngfat Cazloegbauj Gvangjsih Bouxcuengh Swcigih》 hengzguh, Canghvuz Yen aeu fapceih hen swnh、soqcih hawjrengz、hanghmoeg daiqdoengh、ngoenzciet doxdax doxlienz, doi- nyoengx cazloegbauj daengx diuz lienh canjyez hwnjmbaek lai ndei.

Dangguh dieg ndaem guh cazloegbauj, Canghvuz Yen gaemgaenj aen lohnaemj hwngfat “sam nyienz roek caz”, aeu doekguh 《Diuzlaeh》 dangguh gaiq hong youqgaenj doinyoengx canjyez hwngfat ndei saed. Aen yienh neix baengh ciet hai caz cazloegbauj、aen singhgiz senhconz vwnzva cazloegbauj doengh gij yienghsaeh neix, coh cazgi、hozcozse、ranz dajndaem lai caeuq bouxcawx senhconz bujfaz, hopheux cazloegbauj dinghngeih、baujhoh deihleix geiqhauh、guenjleix ndei suencaz、gveihfan gij dinfwngz guh nduj、yocang bienqget biucinj、lienz nungz daiq nungz gihci daengj neiyungz bae gejdoeg, hawj faplwd diuzfaenz byaijhaeuj ndoicaz、cazgi caeuq ndaw sim vunzlai bae.

Soqcihvaq dwg aen banhfap youqgaenj Canghvuz doihaeuj cazloegbauj canjyez hwnjmbaek. Aen yienh neix guh “cazyez gvairaeh”“soqcih mbawcaz” song loek gyaepdoengh, nangqdaengz daengx yienh 100 goengq ndoicaz, gyoebsuenq ndalaeb vangjdoxlienz gamcaek sezbei 575 dauq. Baengh bienhenz geiqsuenq caeuq aen vunq AI fwj, hidungj ndaej yawjrox binghmbawremj、mbawcaz baenz nengz baenz non doengh gij bingh lai baenz neix, yawhgingj cinjdeng daengz 92.6%.

Doengzseiz, Canghvuz Yen fatbouh aen cwngzsi iq “Caz Goek Cazloegbauj” caeuq aen hidungj ra goek binjcaet huq dieg ok nduj, geiqloeg mbaet mbawcaz moq、guh hongsaeh、genjcwz baugau、gij dinfwngz guh nduj、yocang bienqget、rizsienq vuzliuz doengh gij hot gvanhgen neix, guhbaenz cazloegbauj “daj suencaz daengz boicaz” caz ndaej、niemh ndaej、guenj ndaej liuxliux.

Mboengq ngoenz caz gozci, Canghvuz Yen ciepbanh mbat doxdax dinfwngz guh caz lauxcangh lajmbanj、langhbaij caz canjyez caeuq gij yienghsaeh gaujcaz doxgyau suencaz gvairaeh, doinyoengx cienzswnj dinfwngz guh caz ciuhgeq caeuq yungh gohgi daihneix caemhyamq. Canghguhcaz caemh daiz doxdax, langhbaij song naengj song at、 yocang bienqget doengh gij dinfwngz neix; nungzyez gihgou、gohyenz yensoj caeuq giyez daibyauj byaij haeuj dieg ndaem guh youqgaenj, yawjngonz vangjdoxlienz gamcaek、 AI yawjrox、cinjcing dwkbwnh、gihgvailen ra goek daengj wngqyungh ciengzgingj.

(Liengz Genzswng Fungz Binghmeiz)

编辑：实习生廖小凤复审：黄慧华终审：蒙树起