Nanzningz 446 Aen Segih Caemhguh Minzcuz Doxgiet

来源：广西民族报网

发布时间：2026-08-19

Mboengqneix, gicej daj aen hoih fatbouh sinhvwnz gij guhbaenz hong saehnieb minzcuz doxgiet baenaj Nanzningz Si roxyiuj, geij bi neix daeuj, Nanzningz Si aeu couqmaenh gij eiqsik Cunghvaz Minzcuz ranz vunz ndeu dangguh diuz sienqmeh gak hangh hong daengx si, caezhwnq caezyungh “haj aen suenranz”, gij guhbaenz “aen si guhyiengh minzcuz doxgiet baenaj daengx guek” ndaej laebdaeb gyamaenh lai ndei. Daengz seizneix, aen si neix gyoebsuenq ndaej bingz aen cizdij guhyiengh minzcuz doxgiet baenaj daengx guek、daengx gih 204 aen(baez)、bouxvunz guhyiengh 296 boux, aen danhvei guhyiengh gih guhyiengh minzcuz doxgiet baenaj 91 aen(baez), hong cauhlaeb minzcuz doxgiet baenaj daj dieg dog byaij coh gizgiz cungj guh.

Nanzningz Si hwnq ak aen dieg segih, daj gihcwngz guh hwnj, guh ndei “it segih it binjbaiz”. Aen si neix 446 aen segih bienqbaenz aen dieg hoenxciengq akgeng “dangjgen+minzcuz doxgiet baenaj”, gungganq ok Funglingjbwz Segih fapguhhong “123 ngveihsigloux”、Mingzsiunanz Segih fapguhhong “mbouj doxliz”、Lungz- sieng Segih “ranz youq Lungzsieng” doengh gij binjbaiz guhhong gihcwngz neix.

Nanzningz Si laebdaeb 17 bi guh ndwen senhconz minzcuz doxgiet baenaj, baengh gwnz muengx lajbiengz gangj ndei gij goj minzcuz doxgiet Nanzningz. Aeu gij fouzhauh caeuq yienghsiengq Cunghvaz vwnzva gak minzcuz caemhmiz caezyungh de, yungzhaeuj “vuenyungz leuleulo” “daizgo singzheu” daengj binjbaiz vwnzva vunzlai caeuq dieg gunghgung vwnzva bae, baengh Lij Mingzyui、Veiz Bazginz daengj gwzming lezsw gijnen’gvanj doengh gij swhyenz saekhoengz neix cienzswnj lwedmeg saekhoengz, dajcauh aen gvangjcangz vwnzva caemhsim daengj buek gaiq dieg senhconz gyauyuz ndeu. Gaplaeb aen doih bouxsenhconz giemguh, doinyoengx “ngveihsigloux·gangj” senhgyangj binjbaiz haeuj gihgvanh、haeuj segih、haeuj giyez、haeuj hagdangz.

Nanzningz Si aeu hwngfat ndei saed doekguh daengz dieg minzcuz guhhoengh canjyez、gaijndei gijgwn gijdaenj bouxminz caeuq hawj gunghgung fugsaeh lai ndei bae, gij guhbaenz engqlai engq goengbingz ndeileih daengz gak cuz vunzlai. Ngaenzcienz caizcwng cinjcing yungh daengz dieg aeu yungh bae, dungjcouz yungh ngaenz hwngfat saujsu minzcuz cunghyangh、swcigih、si bonjgaep, guh buek hanghmoeg bangrengz dieg minzcuz canjyez hwngfat、gaijndei giekdaej sezsih caeuq hangz fwngzguh minzcuz doxyungz cauhmoq hwngfat, coihaeuj minzcuz doxgiet caeuq guhhoengh lajmbanj caemhyamq; yungh ndei yungh cuk aen cwngcwz ciqngaenz diepsik minzmou minzbinj, hawj giyez swnghcanj onj、gyalai gangjvei, daiqdoengh gak cuz vunzlai youq bakdou ranz ndaej ngaenz roengz daeh.

(Van Yizmingz)

编辑：实习生廖小凤复审：黄慧华终审：蒙树起