Lungzswng Vatcimh Swhyenz Ndangdaenj Feihyiz Hawjrengz Vwnzlij Lai Ndei

来源：广西民族报网

发布时间：2026-08-18

Lungzswng Gak Cuz Swciyen laebdin gij swhyenz ndei lai minzcuz doxyungz caemhyouq, baengh gij vwnzva ndangdaenj miz daegsaek, doinyoengx minzcuz conzdungj vwnzva miz cauhguh miz cauhmoq hwngfat.

Hopheux gij baijbouh hwngfat vwnzlij daengx gizdieg, baengh nazmbaeklae Lungzciz、aenmbanj minzcuz miz daegsaek daengj dieg neix, haeujlaeg vatcimh gij raiz ndangdaenj miz daegsaek gak cuz、dinfwngz fwngzguh caeuq vwnzva fouzhauh daengj yenzsu daeuz, yawj vunzlai gyaezmaij caeuq hawciengz gaicawx aeuyungh, laebdaeb guhndei yiengh boiqsaek ndangdaenj、gaijndei dinfwngz fwngzguh, doinyoengx ndangdaenj minzcuz daj dandog langhbaij okdaeuj, coh ngoenznaengz daenj、huqsanj faenzcauh、dieggingj yenzgiu hagsib daejniemh daengj lai yiengh hwnjmbaek.

Laebdin gijndei swhyenz feihyiz bonjdieg, cinjcing doiqciep Yez Gangj Au Davanhgih cauh’eiq ndei、 dajveh、hawciengz swhyenz, guhlaeg Gvangjdungh Gvangjsih doxgap hawjrengz saedyauq. Gaenxmaenx gap doih aeu guekgya gaep feihyiz ndangdaenj Hungzyauz、ndangdaenj Banzyauz caeuq gijsiuq Bouxcuengh doengh gij doxgaiq miz daegsaek, bae Gaiq Daih Ngeihcib Ngeih Cunghgoz（Sinhcin） Gozci Vwnzva Canjyez Bozlanj Gyauhyizvei oknaj, baengh aen bingzdaiz ak gya’gvangq aencueng langhbaij、lienzciep hawciengz ndei. Lai hag’aeu Sinhcin gij leixniemh dajveh senhcin、gij vunqsik yinhguenj baenz ndei caeuq diuzroen hawciengz gvangqlangh, cungdenj gungganq diengzhong feihyiz bonjdieg、aen doih mehdajsiuq, bangfuz aenmbanj densangh yienghmoq, gyoebsuenq yenzfat bae gai gij doxgaiq faenzcauh ndangdaenj minzcuz miz daegsaek 30 lai loh, daiqdoengh diegguenj geij bak boux mehmbwk gak cuz youq henz ranz miz hong guh、an’onj ndaej ngaenz roengz daeh.

Lai yungh ndei gijndei cwngci daegbied dungjyiz cansen comzgyonj simvunz、comzgyonj rengz, gaem- maenh diuz sienqmeh couqmaenh gij eiqsik Cunghvaz Minzcuz ranz vunz ndeu, damqra cauhlaeb diuz roen hwngfat doxyungz laegdaeuq “ndangdaenj feihyiz+vwnzlij canjyez+minzcuz doxgiet”, aeu cienzswnj baujhoh feihyiz、vwnzlij canjyez hwnjmbaek、cauhlaeb minzcuz doxgiet baenaj doxcaez doi baenaj, laebdaeb coihaeuj gak minzcuz doxbyaij doxgyau doxyungz.

(Liuz Youyiz)

编辑：实习生石喜丹复审：黄慧华终审：蒙树起