Gvangjsih Fatbouh Aen Gviveh “Cibhaj Haj” Guhhoengh Hwngfat Cunghyihyoz(Ywcuengh Ywyauz)

来源：广西民族报网

发布时间：2026-08-18

Mboengqneix, Swcigih Cwngfuj Bangunghdingh yaenqfat 《Aen Gviveh “Cibhaj Haj” Guhhoengh Hwngfat Cunghyihyoz(Ywcuengh Ywyauz) Gvangjsih》(baihlaj naeuz 《Gviveh》). 《Gviveh》 mingzdingh dwen daengz, daengz bi 2030, aen gihci cienzswnj cauhmoq hwngfat Cunghyihyoz engqgya laebndei, aen dijhi fugsaeh Cunghyihyoz doh daengz bouxboux、daengx hopgeiz sengmingh engqgya laebcaez, daihdaej guhbaenz aen buenz moq hwngfat Cunghyihyoz fugsaeh ndei bouxminz、canjyez hwngvuengh、cauhmoq hoenghhwd、hailangh bauyungz haenx.

Cuksaed goekgaen fugsaeh yihliuz、daezswng rengz baujcang cangqheiq, dwg aen fuengyiengq ok rengz haenq 《Gviveh》 ndawde aen ndeu. 《Gviveh》 vixok, yaek swnggaep gij rengz fugsaeh gyonjcomz Cunghyih duenqyw laemzcongz、gouqyw wngqgip、fuengz bingh、ciengxhoh ndangcangq、guenjleix hongsaeh yw daengj, lienzdaemh hawj Ywcuengh Ywyauz fugsaeh ndangcangq lai raenhamq, cingcinj doiqciep gij aeuyungh ndangcangq vunzlai lai yiengh de. Caemhcaiq, hengzguh aen gunghcwngz Cunghyih Sihyih dox giethab hwngfat ndei saed, doihaeuj aen yihyen ak Cunghyih Sihyih doxgap guekgya、aen hanghmoeg hwnqguh (gungganq) gohsiz ak, senj buek hanghmoeg cwkrom gaep swcigih ndeu, doinyoengx gihcwngz guh Cunghyih Sihyih dox lienzhab fugsaeh duenqyw bingh ciengzraen、bingh lai baenz haenx.

Baenzlawz vih Cunghyihyoz (Ywcuengh Ywyauz) cauhmoq hwngfat dwk haeuj rengz baihndaw? Gohgi cauhmoq caeuq hwnqguh aendoih vunzcaiz liedbaenz giz youqgaenj. Gvangjsih yaek hengzguh aen gunghcwngz daezswng gohgi cauhmoq Cunghyihyoz(Ywcuengh Ywyauz), laebdaeb doinyoengx mizgven gizdieg gohyenz cungbyoengq. Gungganq vunzcaiz fuengmienh, hengzguh aen dajveh gungganq vunzcaiz miz daegsaek Cunghyihyoz, laebdaeb hwnqguh buek diengzhong cienzswnj lauxhangz Cunghyihyoz geq mizmingz ndeu, caemhcaiq doenggvaq son- gyauq canghyw mizmingz、son’gyauq vunzcaiz ak、guhhoengh vunzcaiz gihcwngz caeuq vunzcaiz giepnoix gaenjyungh doengh gij dajveh cienmonz son’gyauq neix, gungganq aendoih vunzcaiz miz daegsaek Cunghyihyoz.

《Gviveh》 cauhmoq daezok hengzguh aen hengzdoengh “yinzgungh cinwngz+Cunghyihyoz”, aeu soqcih hawjrengz、cinwngz swnggaep doinyoengx dieg yungh Cunghyihyoz bienqvaq moq、raenhamq lai. Gidij neiyungz baugvat: Haeujcoengh swcigih yinzgungh cinwngz Ywcuengh Ywyauz duenqyw ciengzgingj gunghcwngz yenzgiu cunghsinh daengj buek hanghmoeg ndeu, cujciz guh aen hanghmoeg hwnqguh cang soqgawq caetliengh sang Cunghyihyoz, cauhlaeb aen bingzdaiz comz yiengh soqgawq gvairaeh lai dieg mbouj doengz Cunghyihyoz, caemhcaiq haeujcoengh yenzgiu haifat buek sezbei caeuq hidungj gvairaeh bang duenqyw Cunghyihyoz ndeu.

《Gviveh》 baijbouh lai hangh gunghcwngz cungdenj, mad rongh mbaw mingzben canjyez Cunghyihyoz miz daegsaek Gvangjsih. Lumjbaenz, baijbouh aen gunghcwngz daezswng gij caetliengh yw Cunghyoz、aen gunghcwngz daezswng gyoengq canjyez yw Cunghyoz daengj, lai cungj banhfap caemh yungh coihaeuj daengx diuzlienh canjyez Cunghyihyoz hwngfat ndei saed. Baengh aen giek neix, dajcauh diuz sienqloh ndei lijyouz ndangcangq Cunghyihyoz miz rengz ciuyinx gozci ndeu, doinyoengx gij vwnzva Cunghyihyoz、lijyouz ciengxndang、duenqyw diuzleix、gaiqyw gwn ciengx cienzmienh doiqciep hawciengz gozci.

(daj 《Gvangjsih Yizbau》 aeu daeuj genj hoiz Loz Cing)

编辑：实习生廖小凤复审：黄慧华终审：蒙树起