Gienjraez Mancuengh Dahyinh Bingzluz Hainduj Daemj

来源：广西民族报网

发布时间：2026-08-12

Mboengqneix, aen yizsiz hainduj daemj gienjraez Mancuengh Dahyinh Bingzluz youq Nanzningz guh. Mbaw gienjraez neix aeu Mancuengh cungj dinfwngz gaeuqgeq neix daeuj guh, aeu faenzmeg minzcuz、seizdaih gunghcwngz caeuq minzcuz doxgiet doxyungz, yienh’ok gij yiengh gyaeundei Dahyinh Bingzluz aen sigij gunghcwngz neix, langhbaij gij yienghsiengq cingsaenz gak cuz bouxminz doxgiet baenaj youq mwh hwnqguh dahyinh. Ciuq cam rox, vih hoizdauq gij yienghsiengq hoenghhwd dahyinh cinjdeng、yienh’ok henzdah gij saeq, gienjraez Mancuengh dajveh guh beijlaeh dwg 10000:1, raez 13.4 mij, sang 1.8 mij. Aen doih daemj guh dajveh 16 boux vunz neix doxyungz dah moq caeuq yinhgeq、lamzdoz caeuq cingz mbanj、hwnqguh caeuq swnghdai daengj leixniemh, aeu gij yienghraiz ciuhgeq Mancuengh guh giekdaej, yungzhaeuj minzcuz doxgiet、Dunghmungz lienzdoengh yenzsu, cungdenj gaekveh Majdau、Gisiz、Cinghnenz 3 aen hangzyinh suhniuj, daemj fuk “man sijsei” miz gij simmuengh bak bi、yienh’ok gij cingsaenz seizdaih、gietcomz gij rengz minzcuz ndeu, hawj gij dinfwngz Mancuengh gaeuqgeq youq ndaw aen sigij gunghcwngz dangdaih fatrongh, hawj ceh faen minzcuz doxgiet doenggvaq mbat cim mbat mae caprag diegdeih Betgveiq.

Mbaw gienjraez Mancuengh neix youz Gvangjsih Mancuengh Bozvuz- gvanj caeuq Gvangjsih Cizsiu Fazcanj Yenzgiuvei、Gvangjsih Ginhcangginj Vwnzva Douzswh Youjhan Gunghswh daemj, ndaej daengz Gvangjsih Cizyez Gisuz Dayoz、Gvangjsih Yisuz Yozyen、Nanzningz Swhfan Dayoz Gvangjsih Conzdungj Gunghyi Yenzgiuyen daengj danhvei haenqrengz haeuj- coengh. Gienjraez youq bineix 5 nyied hainduj daemj, guj daengz gozging guh sat.

Mancuengh miz gij lizsij vwnzva naekna, hoeng aenvih dinfwngz daemj fukcab daengj yinhsu cienzswnj caeuq canjyez hwngfat bungz daengz hojnanz, vih cungbyoengq gij hojnanz cienzswnj cauhmoq Mancuengh, Gvangjsih Cizyez Gisuz Dayoz caeuq Gvangjsih Ginhcangginj Vwnzva Douzswh Youjhan Gunghswh doxcaez hwnq yenzgiu haifat aen cang gihyinh Mancuengh caeuq aen bingzdaiz soqcihvaq, caemhcaiq ndaej bi 2025 Vwnzva Caeuq Lijyouzbu aen hangh- moeg saedhengz cauhmoq daezcaet ganq ndei laebhangh. Bingzdaiz daj- cauh aen cang gihyinh Mancuengh、aen hidungj guhbaenz doz Mancuengh “yinzgungh cinwngz+”、aen dijhi soqcihvaq Mancuengh vwnzva hihnij dijyen’gvanj sam yiengh gap aen. Youq ndaw mbaw doz dajveh gienjraez Mancuengh Dahyinh Bingzluz, aen hidungj guhbaenz doz Mancuengh “yinzgungh cinwngz+” miz yungh lailai, boux dajveh baengh aen hidungj neix guhsat doxyungz cauhmoq yienghraiz minzcuz ciuhgeq caeuq gij yenzsu gunghcwngz dahyinh daihneix.

Ciuq cam rox, youq aen seiz Dahyinh Bingzluz yaek haidoeng, doihaeuj Mancuengh feihyiz soqcihvaq baujhoh、yungh lix caeuq cauhmoq cienjvaq, mboujdan dwg cauhmoq saedhengz cienzswnj yungh lix feihyiz, hix dwg gij dapgienj yungh vwnzva hawjrengz sigij gunghcwngz、couqmaenh gij eiqsik Cunghvaz Minzcuz ranz vunz ndeu.

(Veiz Yingjcinh Banh Gensingh)

编辑：黄誉琦复审：黄慧华终审：蒙树起