Gvangjsih Bued Cienz Mauhgvaq 20 Ik Maenz Dwkdoeng Dieg Saekgaz Nungzyez Swnghcanj

来源：广西民族报网

发布时间：2026-07-08

Swcigih Caizcwngdingh lwnh vunz rox, Gvangjsih youq mboengqneix bued cienz cienjsenj ceihawj gvendaengz nungzyez buek daihngeih mauhgvaq 20 ik maenz, hopheux gij giekdaej nungzyez swnghcanj、gizdieg youqgaenj、canjnieb raenhamq caeuq saekheu ancienz daengj fuengmienh, haenqrengz dwkdoeng dieg saekgaz nungzyez swnghcanj, coenghrengz daengx bi haeuxliengz laisou caeuq nungzyez hwngfat ndei saed.

Dawzmaenh aen buenz daej ndaem haeuxliengz, daih’it aeu dawzmaenh reihnaz. Baezneix Gvangjsih bued cienz guh caeuq yungh reihnaz 11.2 ik maenz（baugvat cienz guh naz biucinj sang 7.69 ik maenz）, cungdenj guh reihnaz lwnzndaem ce ndwi、noix yungh bwnhvafeiz lai raenhamq、ceihleix dieg saekgaz guh reihnaz doengh gij hong hawj reihnaz lai ndei neix, caemhcaiq haeujcoengh guh moq naz biucinj sang 50 fanh moux、gaijguh daezswng 19 fanh moux, caemhyamq hwngfat naz dwkraemx mbaet raemx 5 fanh moux, gaijgez mbangj di naz “rengx mbouj miz raemx、dumh baiz mbouj ok”、dieg naz lingzsanq daengj vwndiz, lai hawj naz ndaem ok haeux.

Yungh dinfwngz caeuq fugsaeh baujcang caemhyamq. Gvangjsih anbaiz cienz baujcang guh haeux youz caeuq cienz dajciengj aen yienh oklanz mouraemx lai gungh 0.93 ik maenz, haeujcoengh guh doengh gij hanghmoeg haeux youz gomiuz saekheu lai baenz lai raenhamq, vatcimh gij rengzndumj lai ndaem byaekyouzcai, gyavaiq dinfwngz dajndaem comzbaenz caeuq doekdieg yungh; dajciengj aen yienh oklanz mouraemx lai, hawj ndaw lanz miz moumeh seng baenz lwg, soenggej gyaqcienz mou hwnjroengz deng mbouj onjdingh.

Doiq gij yaez diuzlienh nungzyez swnghcanj、dijcienz haemq noix、rengzragdoengh cawjdaej haemq nyieg daengj vwndiz, Gvangjsih anbaiz cienz hwngfat nungzyez swnghcanj caeuq cienz daezswng rengz nungzyez ginghyingz cawjdaej 7.93 ik maenz, cinjcing bangrengz oij、mak、ndaem gosangh ciengx nonsei daengj canjnieb ndei miz daegsaek neix, gyalai yungh dinfwngz ndei miz yungh, haeujcoengh nungzminz hozcozse、gyadingz nungzcangz daengj nungzyez ginghyingz cawjdaej gaijndei sezsih caeuq lai miz rengz, doinyoengx daengx gih nungzyez daj “guh ndaej ok”cienj coh “guh ndaej ndei”、daj “ndaem ndaej baenz” cienj coh “gai ndaej baenz”.

Linghvaih, Gvangjsih baezneix lij bued cienz baujhoh nungzyez swnghdai swhyenz caeuq cienz bangbouj doenghduz fuengzraq 1.33 ik maenz, cungdenj haeujcoengh gyonj yungh ganj gomiuz、baujhoh bya gungq, nem doenghduz aeu dwk cimyawhfuengz caeuq gamcaek, fuengzre baenz binghraq naek daengj fungyiemj, baujcang ciengx doihduz ancienz caeuq miz noh ndei gunghawj onjdingh.

(daj 《Gvangjsih Yizbau》 aeu daeuj hoiz Huz Daiveij)

编辑：实习生韦婷萱复审：黄慧华终审：蒙树起