Makgaivaiz Bwzswz Sou Gai Ngoenz Nduj, Soqciemdingh Mauhgvaq 1.3 Ik Maenz

来源：广西民族报网

发布时间：2026-07-08

6 nyied 10 hauh, gij yienghsaeh gungganq huqndei nungzyez binjbaiz “Gveiq cih hauh” nem bi 2026 makgaivaiz Bwzswz hainduj sou bae gai youq suen makgaivaiz Denzdungh Yen Bingzmaj Cin Siujlungz Cunh guh. Gyoengqvunz sou mak aeu aen dem aen makgaivaiz Daiznungz It Hauh sou haeuj loz bae, cujboh gwnz muengx youq baihnaj gingqdaeuz seizseiz doigawj mak ndei. Ngoenz- haenx, yienhciengz soqciemdingh mauhgvaq 1.3 ik maenz.

Geij bi neix daeuj, Bwzswz doenggvaq lai ndaem lai ndei、gaijcauh suen mak、gaij ndaem cungj mak ndei doengh gij banhfap neix, laebdaeb guhhung aen canjnieb makgaivaiz miz daegsaek neix, bi 2022 gaenq guhbaenz aen moegbiu makgaivaiz najdieg dajndaem、sou ndaej “sueng mauh bak fanh” . Seizneix, daengx si makgaivaiz najdieg dajndaem daengz 122 fanh moux, gungganq si gaep doxhwnj aen giyez lingxdaeuz nungzyez loih makgaivaiz 21 aen、ciennieb hozcozse 420 aen、gyadingz nungzcangz 214 aen, ragdoengh mauhgvaq 10 fanh ranz camgya aen canjnieb ndaem makgaivaiz. “Makgaivaiz Daiznungz It Hauh hawciengz gyaezmaij, seiz ok va lauxhangz son raeuz hoh va dwkbwnh, guh ndei guenjleix doenghnaz, biniex dawzmak lai gvaq bi’gvaq lailai, gyaqcienz soucawx baenz dahraix, ndaem baenz mak ndaej cienz lai.” Siujlungz Cunh ranz dajndaem lai Liuz Dwzyungh gaisau.

Buek dem buek makgaivaiz sou moq laebdaeb yinh daengz Aen Cungsim Gaicawx Makgaivaiz Cungguek Denzdungh Yen, boux- ndaemmak、canghseng’eiq nyaengq roengz huq、hwnj caengh、sou gai. “Dwg makgaivaiz Bwzswz ngamq sou liux, doq sou doq fat、mak ndei lai！” Canghseng’eiq Vangz Dingzhingh doq doiqciep canghsoucawx doq naeuz.

Gvangjsih Denzdungh Yiswngh Cincuzgouj Mouyiz Youjhan Gungh- swh cungjginghlij Linz Dwzwnh ceij gij makgaivaiz coq youq ndaw canggyoet gaisau, giyez yenzfat guh giengh makgaivaiz、binghgizlinz mak- gaivaiz、makgaivaiz hawq doengh gij doxgaiq neix, gai bae Ngozlozswh、Hanzgoz、Yizbwnj daengj guekgya caeuq diegdeih.

Bwzswz Si lij cingjhab gak loih swhyenz, dajcauh aen dijhi hwngfat daengx diuz canjnieblienh ndaem makgaivaiz、lienhgyoet yo cang、gyagoeng cingdaeuq、hawciengz gai、nungzlij doxyungz. Laebdaeb hawj yiengh doxgaiq lai bae, doiok raemx makgaivaiz、makgaivaiz hawq、laeuj makgaivaiz、binghgizlinz makgaivaiz doengh gij doxgaiq gyagoeng neix; baengh suen guhyiengh makgaivaiz、giyez lingxdaeuz、dieg dajndaem, haenqrengz guh youqndwi yawj gingj、lajmbanj gvaq ngoenzgyaj doengh gij saeh moq neix, gyoebsuenq hwnqbaenz 39 aen dieg guhyiengh nungzyez miz daegsaek daihneix, dieg guhyiengh aeu makgaivaiz guhdaeuz、miz caez baeyouz youqndwi caeuq sawqguh hong reih hong naz.

(Lingz Cungh)

编辑：实习生韦婷萱复审：黄慧华终审：蒙树起