Bi 2026 Gij Yienghsaeh Cawjciengz Gvangjsih “Ngoenz Vwnzva Caeuq Swyenz Yizcanj” Guhsat

来源：广西民族报网

发布时间：2026-07-08

6 nyied 14 hauh, bi 2026 gij yienghsaeh cawjciengz Gvangjsih “ngoenz vwnzva caeuq swyenz yizcanj” youq Hocouh Si guhsat. Mbat yienghsaeh neix aen cawjdaez dwg “vwnzvuz gvi bouxminz fugsaeh bouxminz”“feihyiz, hawj ndwenngoenz engq gyaeundei”, doenggvaq caen bae sawqguh caeuq langhbaij lij lix, langhbaij gij yienghsiengq moqsag baujhoh cienzswnj vwnzva yizcanj Gvangjsih gak dieg okdaeuj.

Yienghsaeh yienhciengz, Gvangj- sih vwnzvuz cawjdaez youz cingqsik fatbouh, bang vunzlai veh ok diuz roen “gaen vwnzvuz youz Gvangjsih”; boqcuengq benq geiqsaed daengx guek vwnzva bujcaz baez daihseiq, lwnhgangj le gij henmaenh caeuq dangrap bouxguhhong vwnzvuz hen goekrag vwnzmingz.

Youq dieg langhbaij, yungh doz faenz caemh miz langhbaij gij cingzcik ceiq moq Gvangjsih vwnzvuz baujhoh、gaujguj yenzgiu caeuq feihyiz baujhoh okdaeuj. Daengx gih 14 aen si laeb gih feihyiz hanghmoeg miz daegsaek caeuq gij cozbinj moq bouxcienzswnj cauhmoq gungganq okdaeuj haenx gyoebgyonj oknaj, daj gij dinfwngz gyaqciq daengz gij sijliuh naekna, roix gij cienzswnj caeuq hwngfat goekmeg Betgveiq hwnjdaeuj. “Aen yingz boux henhoh fapceih” daegbied laeb haenx, yungh bujfaz camdap、lauxhangz gejdoeg doengh gij fuengsik doq hag doq guh’angq neix, hawj vunz lai rox《Aen Fap Baujhoh Vwnzvuz》 doengh gij faplwd fapgvi neix, lai rox yungh fap bae baujhoh vwnzvuz.

Aen haw cauh’eiq vwnzva yizcanj vunz lai vunz daih. Ndawbiengz, 14 aen si laeb gih dieg langhbaij feihyiz doxgaiq lailanglang, gij siuq Yauzcuz、mohmeh Boux- cuengh、daehhom Ywcuengh doengh gij dieg bae sawqguh neix miz vunz baizdoih lai, bouxhek miz bouxcienzswnj feihyiz son, caenfwngz bae hag gij dinfwngz ciuhgeq; gwnz muengx, “ciet cawx doxgaiq feihyiz” funghcigboq caemhyamq haiboq, hawj doxgaiq ndei feihyiz hamj gvaq bya haij, byaij haeuj cien ranz fanh hoh. Hab vwnzvuz、sawqguh atyaenq doengh gij hanghmoeg neix, engq hawj “dawz vwnzvuz riengz ndang、dawz feihyiz dauq ranz” bienqbaenz caen.

Guh yienghsaeh geizgan, Aen Hoih Doxgyau Yozsuz Baujhoh Leihyungh Vwnzvuz caemhseiz guh. Gyoengq lauxhangz yozcej ndaw gih rog gih hopheux aen cawjdaez “vwnzvuz gvi bouxminz fugsaeh bouxminz”, lailai doxyaeng, ok geiqmaeuz ok banhfap coenghrengz gij saehnieb vwnzvuz Gvangjsih hwngfat ndei saed.

(daj 《Gvangjsih Yizbau》 aeu daeuj genj hoiz Cuz Mungz)

编辑：实习生韦婷萱复审：黄慧华终审：蒙树起