Gvangjsih（Cungzging） Canjyez Hozcoz Cunghsinh Biengj Baiz Laebbaenz

来源：广西民族报网

发布时间：2026-07-08

5 nyied 22 hauh, Gvangjsih（Cungzging） Canjyez Hozcoz Cunghsinh youq Cungzging biengj baiz laebbaenz. Neix dwg Gvangjsih youq Cungzging daplaeb aen bingzdaiz canjyez doxgap “laebdin Swconh Cungzging、hwngfat Gvangjsih、dox- lienz roenloh、najcoh Dunghmungz”, doinyoengx cauhlaeb diuz lienh canjyez、lienh gunghawj、lienh cauhmoq hamj gizdieg baengh diuzroen moq baihsae doeng haij de.

Gvangjsih（Cungzging） Canjyez Hozcoz Cunghsinh youz Bwzbuvanh- gangj Cizdonz hwnqguh guenjyinh, yaek baengh gij giekdaej caeuq gijndei Bwzbuvanhgangj Cizdonz youq dieg baihsaenamz gyonj huq、canjyez doxgap daengj fuengmienh, lai cingjhab gijndei Cungzging canjyez gyonjcomz、hawciengz gvangqlangh、vunzcaiz lai, caeuq gij swhyenz haedsim Gvangjsih henz haij gaenh gangj、roenloh doengrat、hailangh bingzdaiz, lai hawj diuzroen Gvangjsih caeuq dieg baihsaenamz canjyez doxgap doengrat, hopheux canjyez gaenh gangj、vuzliuz daihneix、canghbei dajcauh、hamj guek gaicawx doenghgij dieg youqgaenj neix, ciengzseiz guh ciu canghseng’eiq daeuj roengzcienz、gohgi cauhmoq、comz vunz aeu dungxcaiz, doinyoengx engqlai hanghmoeg ndei doekdieg baijbouh、swhyenz ndei gyonjcomz caezyungh, coihaeuj gizdieg caeuq gizdieg canjyez dox lienzhaeh doxcaez hwngfat.

Ciuq cam rox, geij bi neix daeuj, Gvangjsih Cungzging song dieg youq canghbei dajcauh、vuzliuz daihneix、hamj guek gaicawx doenghgij dieg neix canjyez doxgap giekdaej maenhsaed、guhbaenz lailai, rengzndumj doxgap ndaej laebdaeb cuengq okdaeuj. Hwnqlaeb Gvangjsih（Cungzging） Canjyez Hozcoz Cungh- sinh yaek lai coihaeuj Gvangjsih Cungzging canjyez doxgap doxgyau, doinyoengx song dieg swhyenz doxbouj、hawciengz doxdoeng、canjyez doxcoi, laebdaeb guhlaeg dieg ginghci Bwzbuvanh caeuq Cwngzduh Cungz- ging song dieg ginghci dox boiqhab hwngfat, lai ok rengz coengh dieg baihsae hailangh ndei、hwngfat ndei saed.

（daj 《Gvangjsih Yizbau》 aeu daeuj genj hoiz Goz Yagingz Yangz Sihyij）

编辑：实习生韦婷萱复审：黄慧华终审：蒙树起