Cograwz Cib Bi, Gvangjsih Cienzmienh Guh Goengloh Lijyouz Daengx Gizdieg

来源：广西民族报网

发布时间：2026-07-08

Mboengqneix, gicej daj aen hoih yienhciengz doinyoengx “loh lajmbanj seiq ndei” hwngfat ndei saed daengx gih bi 2026 roxyiuj, cograwz cib bi（bi 2026 daengz bi 2035）, yaek cienzmienh hwnqguh goengloh lijyouz daengx gizdieg caeuq guh boiqdauq sezsih, doinyoengx goengloh lajmbanj caeuq goengloh daeuz、lijyouz gingjgih doxciep ndei, dajcauh goengloh lijyouz miz daegsaek.

“Cibseiq Haj”doxdaeuj, Gvangj- sih itloh aeu dungjcouz hwnq guenj ciengx doxcaez doihaeuj, guhbaenz goengloh lajmbanj daj “byaij ndaej lo” daengz “byaij ndaej ndei”、“loh gyaudoeng” daengz “loh funghgingj”、“loh baenzmiz” daengz “loh vuenyungz” cienjbienq, guhbaenz “loh doeng、nieb hwng、minz fouq、gingj gyaeu” aen buenz hwngfat ndei neix.

Haj bi doxdaeuj, daengx gih hwnq moq goengloh lajmbanj 4.1 fanh goengleix, gungh raez cungbyoengq 15.8 fanh goengleix, cunh doeng loh daengjgaep、yanghcin doeng sam gaep caeuq doxhwnj goengloh、mbanj doeng loh dajndongj faenbied daengz 99.9%、99.5%、94.0%， daengx gih roen- muengx laebdaeb guhndei. Guhsat coih hung 7115 goengleix, hengzguh anfuengz gunghcwngz 2 fanh goengleix, gaijcauh giuzyiemj 857 aen, daiqdaeuz doihengz goengloh bujdungh dwkvaih baujyiemj, guenj ciengx gihci mboujduenh laebcaez.

Liujcouh Ducunh daengz Cwngzdonz goengloh ndaej bingz baenz daengx guek “cib diuzloh lajmbanj ceiq gyaeu”, Gveilinz Yilungzhoz lijyouz goengloh ndaej bingz baenz daengx guek “diuzloh ceiq hoengh”, daengx gih hwnq baenz loh lijyouz、loh canjyez、loh swhyenz 3402 goengleix, yienh yangh cunh sam gaep vuzliuz dijhi daihdaej guhbaenz, hek huq youz yungzhab vunqsik hawj diuzloh doxgaiq reihnaz ok mbanj haeuj singz ndaej doengrat.

Yamqlaeng, Gvangjsih yaek baenzroix doihaeuj aen hengzdoengh daezswng lwnz moq “loh lajmbanj seiq ndei”. Youq roenmuengx hwnqguh fuengmienh, daengz bi 2028 guhbaenz 100% yanghcin doeng sam gaep doxhwnj goengloh, bi 2030 guhbaenz aen mbanj gyaeujvunz haemq lai roen dajndongj 100%, dwk doeng loh gatduenh、hawj doxdoeng liuxliux. Youq guenj ciengx hoh fuengmienh, baujmaenh goengloh lajmbanj ndaej guenjhoh ndei, doihaeuj goengloh lajmbanj soqcihvaq、saenqsikvaq guenjleix. Youq yinhguenj fugsaeh fuengmienh, daengz bi 2027 yienh gaep hingzcwnggih miz diuzgienh de daihdaej guhbaenz lajmbanj hek huq youz yungzhab hwngfat cwgoemq liuxliux.

（daj 《Gvangjsih Yizbau》 aeu daeuj hoiz Goz Yenginz Couh Yiz）

编辑：实习生韦婷萱复审：黄慧华终审：蒙树起