“Haj It” Youz Gvangjsih Baeyouz Hoihhoengh Vwnzlij

来源：广西民族报网

发布时间：2026-07-08

“Haj it” gyajgeiz yaek daengz, Gvangjsih gij yienghsaeh vwnzlij caeuq fukleih hawj bouxminz ndaej ndei miz lai. 4 nyied 26 hauh, Swcigih Vwnzva Lijyouz Dingh lwnh vunz rox, daengx gih yaek doiok 130 lai aen yienghsaeh vwnzlij cungdenj caeuq 180 lai aen banhfap bienzngeiz vwnzlij, baugvat yienjheiq、sawq feihyiz、aen haw ciuzlouz、yawjngonz gingjsaek daengj lai dieg.

Yienjheiq doxlwnz hwnj daiz, hawj ngoenzgyaj hoenghhwd. Nanzningz Si yaek banh Cai Yihlinz yienjciengqhoih, “Sam Nyied Sam Gvangjsih Aen Ciet Angq Betgveiq” Nanzningz gozci minzgoh yisuzcez “2026 fwen langh daihdeih” yaek youq Byacinghsiusanh yienjok. Bwzhaij Si banh TMC denyinhcez, aeu gingjsaek henz haij caeuq yinhyoz ciuzlouz dox giethab, hawj bouxhek lai rox gij yinxdaeuz henz haij.

Yienghsaeh minzsuz lai cungj lai yiengh, yinxdaeuz lailang. Liujcouh Si Mungvuh Mbanjmyauz caeuq Sanghlungzgouh Gingjgih doiok ciet gij dajcang ngaenz dahsau, sawq fwngzguh DIY feihyiz Myauzcuz、 eu fwen daengj yienghsaeh yaek yienjok. Gveilinz Si Duzsiufungh Vangzcwngz Gingjgih dajcauh seiz vangzfuj doxbungz “Mingzcauz daeuj hoenx”, haeujlaeg bae sawq moq guekfung youz suen.

Cawz yienghsaeh vwnzlij lai cungj lai yiengh le, fukleih bienzngeiz hix miz lai, baugvat gemjmienx feidou、gwn youq dajciet doengh gij neix, ndawde mizmbangj bienzngeiz ndaej doxdaeb yungh, hawj bouxminz bouxhek gyajgeiz baeyouz engq habsoq. Gingjgih feidou fuengmienh, bouxhek youq Nanz- ningz Byacinghsiusanh、Yenz- bozyenz、Dungvuzyenz、Byacwx daengj gingjgih, gaem mbaw feidou yienjheiq ndaej haeuj aen dou nduj aeu buenq cienz; Liujcouh Sangh- lungzgouh、Mungvuh Mbanjmyauz Gingjgih cawx fei sam ngoenz ndawde ndaej seizbienh haeujok; Gveilinz Danhyaz·Bazgozcai、Dieg Baeyouz Mboqraeuj Lungzswng caeuq Bwzhaij Aen Cueng Haij、Haijswhsouj Gangj Gingjgih daengj doiok “haj it” fei cienmonz hawj bienzngeiz.

Gwn youq fuengmienh, bouxhek gaem gaiq baengzgawq feidou Gvangjsih Dijyuz Cunghsinh yienj- ciengqhoih caeuq mbaw sinh- fwncwng, daengz Nanzningz Vangoz Ciujgyah、Yunghcwngz Yingi、Liyenz Sanhcangh daengj dieg cawx faenj gwn faenj, ndaej dajciet、mbaw fei lawh ngaenz daengj bienzngeiz; Vuzcouh、Laizbinh daengj dieg mbangj ciujden doiok roek daengz bet ciet fuengzgyaq dajciet, hawj bouxhek guhcaemz engq vuenyungz.

(Vangz Siuvaz Liengz Banzswngh)

编辑：实习生韦婷萱复审：黄慧华终审：蒙树起