Geiqdoh Nduj Gvangjsih Gizdieg Gunghyez Yinzgungh Cinwngz Hwzsinh Canjyez Canjciz Daengz 229 Ik Maenz

来源：广西民族报网

发布时间：2026-07-08

Mboengqneix, Swcigih Gunghyez Caeuq Sinsizva Dingh lwnh vunz rox, bineix geiqdoh nduj, daengx gih gunghyez swnghcanj gyavaiq lai hwnj, giyez yawhgeiz laebdaeb coh ndei, hangz cauhguh cib aen canjyez daeuz hung hwngfat riengjret, gunghyez ginghci haidaeuz bingzonj、ndaw onj baenaj、coh moq coh ndei. Soqgawq yienh’ok, geiqdoh nduj, daengx gih gveihmoz doxhwnj gunghyez soq demgya doengzbeij lai hwnj 6%, beij 1-2 nyied daezsang 0.8 aen bakfaendiemj; 3 nyied ndwen haenx doengzbeij lai hwnj 7.2%, beij daengx guek sang 1.5 aen bakfaendiemj, hwnj vaiq youq daengx guek baiz daih 10 vih.

Bineix doxdaeuj, Gvangjsih laebdaeb guh aen hengzdoengh sam bi guhhoengh gunghyez lwnz moq caeuq aen hengzdoengh “yinzgungh cinwngz+cauhguh”, yinhcienj ndei aen gihci doihaeuj hong “haj aen it” hangz cauhguh cib aen canjyez daeuz hung, haeujlaeg guh fugsaeh diuyenz saeddaej ginghci, doinyoengx gunghyez ginghci haidaeuz bingzonj, hwngfat ndei saed coh moq coh ndei, gunghyez cienzgvaeh okrengz yienhda. Ciuq gyoebsuenq, 1-3 nyied, daengx gih gunghyez cienzgvaeh souhaeuj doengzbeij lai hwnj 13.8%, doengzbeij daezsang 12.5 aen bakfaendiemj, ciemq daengx gih cienzgvaeh bijcung daengz 44.7%, doiq daengx gih cienzgvaeh demlai okrengz daengz 77.8%, baenz gij goek youqgaenj daengx gih caizcwng souhaeuj.

Doengzseiz, Gvangjsih guhlaeg aen hengzdoengh “yinzgungh cinwngz+cauhguh”, guh aen hengzdoengh sam bi hangz cauhguh Gvangjsih cigaij soqcienj lienzmuengx, cingjleix ok doz lohsienq cib aen canjyez daeuz hung yinzgungh cinwngz hawjrengz, senj 133 aen dieg yungh yinzgungh cinwngz hawjrengz, hopheux mizsaek gimsug、gangdiet daengj 6 aen cungdenj hangzyez guh fueng’anq hengzguh baenz hanghmoeg、baenz cingdan, yinzgungh cinwngz gyavaiq hawjrengz baenz diemjrongh geiqdoh nduj gunghyez ginghci. Soqgawq yienh’ok, 1-3 nyied, Gvangjsih gizdieg gunghyez yinzgungh cinwngz hwzsinh canjyez canjciz daengz 229 ik maenz, doengzbeij lai hwnj 16.8%. Ndawde, cizcwngz denlu canjliengh doengzbeij lai hwnj 168.8%, sinhben romyo canjliengh doengzbeij lai hwnj 24.5%, gunghyez gihgiyinz canjliengh doengzbeij lai hwnj 15.4%.

Linghvaih, Gvangjsih yinhcienj ndei aen gihci doihaeuj hong “haj aen it” cib aen canjyez daeuz hung, baenz aen baenz aen canjyez dinghmingz gaiq hong youqgaenj daengx bi, anbaiz mauhgvaq 12 ik maenz ngaenz haeujcoengh cib aen canjyez daeuz hung hanghmoeg 500 lai aen. Ciuq gyoebsuenq, 1-3 nyied, daengx gih hangz cauhguh cib aen canjyez daeuz hung guhsat gveihmoz doxhwnj gunghyez cungjcanjciz doengzbeij lai hwnj 5.9%, hwnj lai beij 1-2 nyied daezsang 1.1 aen bakfaendiemj, ciemq daengx gih gveihmoz doxhwnj gunghyez cungjcanjciz bijcung daengz 89.8%.(Veiz Cing)

编辑：实习生韦婷萱复审：黄慧华终审：蒙树起