Bi 2026 “Gvangjsih Sam Nyied Sam·Aen Ciet Angq Betgveiq” 4 Nyied 18 Hauh Hainduj Guh

来源：广西民族报网

发布时间：2026-07-08

3 nyied 27 hauh, aen hoih fatbouh sinhvwnz bi 2026 “Gvangjsih Sam Nyied Sam·Aen Ciet Angq Betgveiq” youq Nanzningz guh, aen hoih lwnh vunz rox, gij yienghsaeh bi 2026 “Gvangjsih Sam Nyied Sam·Aen Ciet Angq Betgveiq” yaek youq 4 nyied 18 hauh daengz 5 nyied 24 hauh guh. Ndawde, swcigih caengzmienh yaek cujciz 13 hangh yienghsaeh cungdenj, baudaengz aen haimuqsik “Gvangjsih Sam Nyied Sam·Aen Ciet Angq Betgveiq”、baenzroix hoih mingzsingh yienjciengq caeuq ciet ciengqgo、“2026 ndaw mbanj ciengqgo beij ak”、yienghsaeh “seiz siuhfei feihyiz Gvangjsih”“gaenriengz doxdax youz Gvangjsih”、baenzroix yienghsaeh “e muengx angq cawx”、“canghheiq yienjheiq” bouxboux caez yawj、aen singhgiz vwnzva denyingj “sam nyied sam”、Cungguek-Dunghmungz heiqdinj doxdax、Gvangjsih Daizvanh gak minzcuz angqhoh “sam nyied sam”、yienghsaeh vunz henzguek Cungguek Yeznanz caez angq、bixmuqsik caeuq 2026 fwen langh daihdeih, caeuq bienraiz okbanj cek saw《“Sam Nyied Sam” Ndaw Yisuz Cungguek》, caemhcaiq fat fei siuhfei Gvangjsih vwnzlij、mbawgaj vwnzva leih minz、 mbawgaj cienmonz yawj heiq doengh gij ndeileih neix hawj gyoengqvunz.

Bineix haimuqsik yaek youq 4 nyied 18 hauh banhaet youq Nanzningz Si Minzgohhuz guh, laeb miz “seiqgyaiq caez ciengq·sam nyied sam”“guekfung feihyiz·vuenh yiengh moq”“gyaez youq Nanzningz·gvaq ngoenz angq” daengj caet aen danhyenz. Yienghsaeh daejniemh leih minz Minzgohhuz yaek daj 4 nyied 18 hauh laebdaeb daengz 4 nyied 20 hauh. Hoeng bixmuqsik nem 2026 “fwen langh daihdeih” caeuq gaxgonq dan guh haemh ndeu mbouj doengz, bienqbaenz guh 2 ngoenz moix ngoenz “ciengz gvaqringz+ciengz banhaemh” laebdaeb yienjok.

“Fungcingz minzcuz lai yiengh”“doxiu youz Gvangjsih”“minzcuz dijyuz lwenqndei”“e muengx angq cawx”“huzndei youq Betgveiq” haj aen banjgvai yienghsaeh lai cungj lai yiengh. Ndawde “huzndei youq Betgveiq” banjgvai aeu sim doxlienz、fwngz doxdaz、loh doxdoeng guh daegsaek, baugvat gij yienghsaeh cawjdaez vwnzva hwnqguh suenranz cingsaenz caemhmiz Cunghvaz Minzcuz daengj lai loh neiyungz, aen yienghsaeh neix youq Baksaek guh, yaek giethab vwnzva saekhoengz、daegsaek bien’gyaiq、guh cawjdaez senhgyangj、langhbaij conzdungj vwnzva、minzcuz dijyuz doxdax daengj, hawj gak cuz vunzlai caeuqfaenh daengz couqmaenh gij eiqsik Cunghvaz Minzcuz ranz vunz ndeu, gyalai nyinhdoengz aen guekcoj hungmbwk、Cunghvaz Minzcuz、Cunghvaz vwnzva、Cunghgoz Gungcanjdangj、sevei cujyi miz gij daegsaek Cungguek. Caemhcaiq, cungdenj dajcauh gij hengzdoengh segih minzcuz doxgiet “Gvangjsih gekleiz doxhuz”, youq segih、mbanj guh yienjheiq、dijyuz doxdax、baijgai doxgaiq doengh gij saeh neix, hawj caezgya roxnyinh daengz “sam nyied sam” couh youq henzgyawj, couh youq ndawgyang gekleiz.(Veiz Yingjcinh Hoz Sanvaz)

编辑：实习生韦婷萱复审：黄慧华终审：蒙树起